Уопсастыба

Харантыыҥҥа «больничнай» төлөнөр дуо?

Харантыыҥҥа олорор дьон “больничнайдара” хайдах төлөнөрүй? Бу ыйытыыга үлэ, социальнай сайдыы миниистирэ Елена Волкова социальнай ситимнэргэ быһа эпиир кэмигэр хоруйдаата.

Үлэ дуогабарынан (ол иһигэр суһал үлэ дуогабарынан) үлэлиир дьон ыарыйдахтарына, эчэйдэхтэринэ, харантыыҥҥа бардахтарына булгуччулаах страховкалааһынынан туһанар бырааптаахтар. Ол эбэтэр, “больничнай” лиис оҥоһуллар уонна быстах кэмҥэ босуобуйа төлөнөр.

Коронавируһунан ыалдьыбыта бигэргэммит ыарыһаҕы кытта алтыспыт киһиэхэ олорор сиринэн сыһыарыллыбыт поликлиника Роспотребнадзор бэйэни хааччахтаныы туһунан уурааҕар олоҕуран, “больничнай” лииһи биэрэр. Бу киһи “ОМС” полистаах буоллаҕына, “больничнай” лииһин Социальнай страховкалааһын пуондата бастакы күнүттэн ыла төлүүр.

Дьиэ кэргэҥҥэ тумуулаабыт дьону кытары алтыспыт дьоҥҥо “больничнай” төлөммөт. Ол эрээри, кини дьиэтигэр олорон үлэлиэхтээх. Ол кыаллыбат буоллаҕына, үлэһит сайабылыанньатынан уоппуска, эбэтэр төлөммөт уоппуска бэриллиэн сөп. Оттон үлэни биэрээччи бэйэтэ көҕүлээн үлэһити төлөммөт уоппускаҕа ыытар бырааба суох.

Ангелина Васильева, “Саха сирэ” хаһыат, edersaas.ru

Хаартыска: sakha.gov.ru

0
0
Telegram @edersaas20

Добавить комментарий