Дьарааһынныын куобахтыы бардыбыт. Кини билэр сирэ — Кэҥкэмэ тардыытыгар. Күн-дьыл ардахтаах буолан, мотоциклынан айанныырга бэрт эрэйдээх. Ону ол диэбэккэ, күн ортотун ааһыыта үүтээҥҥэ кэллибит. Таһырдьа кулуһун оттуна охсон, чэйдээтибит. Тиэрэ таһылла сытар үүтээн аанын оннугар уурдубут.
Сэрэх муҥнаахтар оттор маспытын үүтэҥнээ тастыбыт уонна ойуурга таҕыстыбыт. Ыттарбыт куобаҕы туруораллар быһыылаах уонна ханна эрэ кыйдаан кэбиһэллэр. Биһиги син ырааттыбыт быһыылаах. Киэһэрэн барда. Хара былыт өркүйэн тахса-тахса хаарынан ыһыахтанна. Сирбит туус маҥан буолла. Дьэ өссө муннубут быһыылаах. Үүтээммитигэр тиийиэхчэ тиийбэппит. Арыт устата-туората көстүбэт ыарҕа айаҥҥа кииртэлиибит. Инчэҕэй быластаах хаар таҥаспытын илдьи сытытта. Табахсыта суох буоламмыт, испиискэ ылары отойун да умнубуппут. Apaaha, биир сири тула тэпсэҥнии сылдьар быһыылаахпыт. Илиҥи-арҕааны быһаарыаҕы, хаар кэлэ-кэлэ көм да көм. Кэлин уһугар, солооһуҥҥа киирэн, квартальнай остуолба сыыппаратын көрөн, буллубут. Үрэхпит бу тула диэммит туһунэн кэбистибит. Үс чаас кэриҥнээн үрэхпитин буллубут. Сыыры батыһа иһэммит ити хаспахха, бу дьөлөҕөскө туһэрбит ахсаана суох. Эбиитин таҥаспыт-саппыт ибили сытыйда. Түүн үөһүн саҕана үүтээммит барыйан турарын көрдүүбүт.
Киирэммит тимир оһоҕу толору симэн уот отуннубут. Онтубут буруотугар тумнаста сыһан, турбалары баҕастары туура тардан ылан таһырдьа элиттибит. Мин кэлээскэбиттэн булчут оһоҕун киллэрэн абыранныбыт. Таҥаспытын ньылбы сыгынньахтанан куурдуннубут. Биир иһит арыгыбытын иһэ-иһэ, аһаан эрдэхпитинэ, түөрт харахтаах ыппыт аан диэки бара-бара үрэн тоҕо барда. Илбигир түүлээх, сиэнчэр күтүр улахан хара ыппыт, сыҥааҕын ууннары уунан баран сытара. Мин көрдөхпүнэ, туох эрэ улахан кулук аантан оһох диэки сүөдэрис гынна да, сүтэн хаалла. Бу үлүгэргэ туох ааттаах быстаран кэллэҕэй диэн тахсан көрбүппүт, туох да биллибэтэҕэ. Хата тыал, хаар өссө күүһүрбүт. Сарсыарда турбуппут харыс хаар саба түһэн кэбиспит. Ити кэнниттэн куобахтыы оонньуу сылдьыахпыт дуо? Дьиэлииргэ тийдибит, оһохпутун төттөрү киллэрэн олортубут.
Айаммытыгар хас сыыр аайы эрэй бөҕөнү көрдүбүт. Араастаан айаннаан, эт бэйэбит эллэйэн, сэниэбит эстэн дьиэбитин буллубут. Ити күлүк туһунан Дьарааһыҥҥа икки сыл буолан баран быктарбытым.
Егор ЕГОРОВ, үлэ, тыыл бэтэрээнэ,
Нам улууһа.
«Эдэр саас» хаһыат архыыбыттан.