Бу күннэргэ Тымныы полюһунан аатырар Өймөкөөн улууһун Н. М. Заболоцкай-Чысхаан аатынан Томтор орто оскуолатыгар «Харалдьык» («Проталинка») үөрэнээччилэр пресс-кииннэрэ аһылынна.
edersaas.ru
Өймөкөөн улууһун 100 сыллаах үбүлүөйүгэр анаан улуус дьаһалтата «Улуус 100 сылыгар — 100 үтүө дьыала» диэн бырйаыагы биллэрбитэ. Томтор орто оскуолатын үөрэнээччилэрэ учууталларын кытта сылы быһа бу бырайыакка сыһыаннаах үгүс сонун сүүрээни киллэрдилэр. Бу күннэргэ оҕолор оскуола иһинэн тэлэбиидэнньэ устуудьуйатын аһан үлэлэтэн саҕалаатылар. Сонун сүүрээн улуустааҕы «Улуус 100 сылыгар — 100 үтүө дьыала» бырайыакка эмиэ үлэ биир бастыҥ холобурун быһыытынан киирдэ. Сонун бырайыагы оскуола дириэктэрэ, нуучча тылын учуутала Алена Егорова сүрүннүүр. Оҕолор үлэлэрин барытын бэйэлэрэ оҥороллор: усталлар, биэриини ыыталлар, таҥаллар, тарҕаталлар.
Биэриилэрин сахалыы-нууччалыы тылынан оҥорон баран, социальнай ситимнэринэн тарҕаталлар.
Биэриилэри уонна сонуннары оҕолор бэйэлэр бэлэмнээн ыыталлар.
Онон төрөппүттэр оскуола күннээҕи олоҕун барытын билэ олороллор. Маны таһынан, «харалдьыктар» оскуола олоҕунан муҥурдаммакка, нэһилиэккэ буола турар сонуннары кытта тиһэн оҥороллор.
Онон сотору кэминэн оскуола оҕолорун устуудьуйата силистэнэн-мутуктанан бардаҕына, аата да этэрин курдук, сааскы харалдьыктыы улууска тиийэ «сүүрүгүрүөҕэ».
Бу туһунан нэһилиэк дьокутаата Дария Тихомирова иһитиннэрдэ.
Елена ПОТОЦКАЯ, «Саха сирэ» хаһыат, edersaas.ru
Хаартыска — «Харалдьык» («Проталинка») устуудьуйа архыыбыттан.