Абаҕам
Валентина Шологонова-Бүлүү КЫЫҺА
Сталинград уот сэриитигэр сураҕа суох сүппүт абаҕабар,
аҕам бииргэ төрөөбүт убайыгар Шологонов Захар Иннокентьевичка аныыбын
Хаһан да көрбөтөх
Абаҕам барахсан!
Хайдах дьүһүннээххин,
Хараҕыҥ хайдаҕын,
Уҥуоҕун көнөтүн…
Хантан ону көрүөмүй?
Биир эмэ кыысчааны
Сөбүлүү көрбүтүҥ дуу…
Хантан ону билиэмий?
Уот сэрии ыйыһыннаҕа…
Сураҕа суох сүтэрдэҕэ…
Туруйа туһунан ырыаларга
Эйигин санаан ылабын,
Саатар ол курус тылларга
Ахтылла тур дуу үйэҕэ…
Волгоград куоракка
Уурбутум эн буоргар
Сибэкки дьөрбөтүн,
Күүппүттүү иһийэн,
Тулам уу- чуумпута…
03.05.2020 с.
Өлбөттөр буолкалара
Улуу Ванга эппитэ дьэ, кэллэ:
Аан дойду үрдүнэн тилиннилэр
Сэрии уотугар охтубуттарбыт,
Кыайыы туһугар өлбүттэрбит-
Хааннарын-сииннэрин сотуннулар,
Буордарын-сыыстарын тэбэннилэр,
Биир кэккэнэн сэлэлии хаамтылар
Аҕалбыт Кыайыыларын күнүгэр.
Оҕолорун, дьоннорун көрөннөр,
Сайдыылаах олохпутун сөҕөннөр,
Дуоһуйдаҕа толук дууһалара,
Туоллаҕа итэҕэс санаалара…
Бүгүн тахсыҥ бары болуоссакка!!!
Хаамсыаҕыҥ биир кэккэнэн иһийэн-
Улуукан Кыайыыны уруйдаһа,
Уоттаах сэриини бопсо-утарса,
Дьолу, или-эйэни түстэһэ
Иһэллэр биһигинниин… КИНИЛЭР!
08.05.2016 с.
Дьокуускай к.
Чурапчы көһөрүллүүтэ
“Көһөрүү” диэн тылга сууланан,
Хаалбыккыт хоту сир буоругар,
Уоттаах сэрии толуга буолан,
Сырыттаххыт дьон дууһатыгар.
Быйаҥын биэрбэтэх алааскыт
Буруйданан харааһыннаҕа,
Хас биирдиигит бардаҕын ахсын,
Аһыйан, кистээн ытаатаҕа…
Ол бааскыт оспокко оҕуолуур,
Чэрдийиэ сыл-хонук ааһыыта,
Олорботох оҕо одуулуур,
Иһиллэр ийэ кыланыыта.
Чараҥҥыт хоҥкуйа суугунуур,
Саас ахсын эһигини суохтуур,
Туруйа энэлгэн хаһыыта
Толорор харалдьык тахсыыта.
Чурапчы, Чурапчы, Чурапчы
Боотурдар төннүбүт сирдэрэ,
Чуо көрөн иккистээн эргийэн,
Төрүүллэр көһөрүү дьонноро…
20.04.2020 с.
Сэрии оҕото…
Сэрии оҕото барахсан…
Араас үлэни толорон,
Итиннэ-манна бырахсан,
Туһаналлара толору.
Сааһа кыра диэбэттэрэ,
Син биир үлэлэтэллэрэ,
Сылайыан санаабаттара,
“Кытаат, өссө!”- дэһэллэрэ.
Кыайбат диэн кыһалҕа баара
Ыраах умнууга хаалара,
Хараҕын уута сүүрэрин
Харытынан хаһыйара.
Ол бэйэтэ бүгүн кырдьыбыт
Сэрии тулаайах оҕото,
Дьиэҕэ ньимиччи хааллыбыт,
Таһырдьа – сэрии сорҕото…
Тэлэбииһэртэн…
Сүрэхтэрэ алдьаммыттар,
Уот сэриини ааспыттар,
Сураҕа суох сүппүттэр,
Атын сиргэ хаалбыттар…
“Сэрии хаһан да буолбатын,
Биһиги билбиппитин,
Биһиги көрбүппүтүн,
Биһиги ааспыппытын
Хаһан да билимэҥ!”- диэбиттии
Сүүһүнэн харахтар
Көрдөһө көрөллөр…
09.05.2020 с.
Хаартыскалар интэриниэттэн.