Дьокуускай куоракка харахха суһал көмөнү оҥорор киин сотору кэминэн күннэри-түүннэри үлэлээбитинэн барыаҕа.
Саҥа киини арыйахтарын иннинэ, СӨ Доруобуйа харыстабылын миниистири бастакы солбуйааччы Алексей Яковлев көрдө-иһиттэ диэн тустаах министиэристибэ пресс-сулууспата иһитиннэрдэ.
Миниистири бастакы солбуйааччы: «Пациеннарга табыгастаах буоллун диэн кыра дьыбааннар кэккэлээбиттэр, USB холбонорго, төлөпүөн иитэргэ розеткалардаах, тэлэбиисэр баар. Манна эмтиир ньымаларын уонна балыыһа туһунан иһитиннэриилэри интэриниэтинэн киирэн көрөргө сенсорнай экраннаахтар. Пандустаах. Иккиһинэн, аныгы тэрилинэн хааччыллыбыт кииҥҥэ суһал эпэрээссийэлэри оҥоруохтара. Оттон эпэрээссийэлэммит пациент күннэри-түүннэри мэдиссиинэ көмөтүн ыларыгар аттынааҕы балыыһаҕа киллэриллиэ. Киин олунньу 21 күнүгэр Стадухин уулуссатыттан көһүөҕэ уонна сарсыарда 8-тан пациеннары ылбытынан барар буолуоҕа, хонугу эргиччи үлэлиэҕэ. Бу пациеннарга да, мэдиссиинэ үлэһиттэригэр да табыгастаах буоларын курдук оҥоһулунна«, — диэтэ.
Өрөспүүбүлүкэтээҕи офтальмологическай килиниичэскэй балыыһа кылаабынай бырааһа Иван Луцкан былырыын сэтинньиттэн маннык арыйар туһунан санаа үөскээбитин этэр. Маныаха сүрүн балыыһаҕа пациеннар хас да кыбаарталы айанныыллара эрэйдээҕин кэпсииллэриттэн, этэллэриттэн итинник быһаарыыга кэлбиттэр. Санааларын тиэрдэн, министиэристибэттэн өйөбүлү ылбыттар. «Өрөмүөннээн, ирдэбилгэ, быраабылаҕа эппиэттиир санитарнай-эпидемиологическай түмүк оҥоһуллан,
лиссиэнсийэ ыллыбыт. Манна даҕатан эттэххэ, бу дьиэ үлэни өссө кэҥэтэргэ табыгастаах буоларын курдук бырайыага учуоттанна«, — диэтэ.
Быраас Валерия Аржакова (клинико-диагностикалыыр салаа чааһын сэбиэдиссэйэ) пациеннары көрүү түһүмэхтэрин, диагностикалыыр тэриллэри уонна эмтиир ньымалары быһаарда, көрдөрдө.
Иван Луцкан: «Сорох пациеннар хос таһыгар туох суруллубутун кыайан көрбөттөр. Оттон уот-күөс киһиэхэ тута көстөр. Онон хос ааныгар суруллубуту кыайан көрбөт пациент регистратор этэн биэрэринэн сирдэтиниэ«, — диэн манна сонун сүүрээн киллэриллибитин эттэ.
Быһаарыы: харахха суһал көмөнү оҥорор саҥа киин олунньу 21 күнүттэн күннэри-түүннэри үлэлиэ. Аадырыһа: Свердлов уул.17, төлөпүөн: 324-386.
