Өрөспүүбүлүкэтээҕи харах балыыһатын кылаабынай бырааһа Иван Луцкан бүгүн, олунньу 3 күнүгэр, быһа кэпсэтиигэ тахсан Саха сирин олохтоохторун ыйытыыларыгар хоруйдаата.
edersaas.ru
Быһа сэһэргэһии саҕаланыаҕыттан элбэх ыйытыы киирдэ. “Тоҕо сорох дьоҥҥо харах эпэрээссийэни аккаастыылларый?” диэн ыйытыы киирбитигэр Иван Петрович маннык хоруйдаата:
— Харах эпэрээссийэтин аныырга, доруобуйа туругун көрдөрүүтэ эппиэттиир буолуохтаах. Холобур, саахара үрдүк киһини хирург ылара көҥүллэммэт. Уопсайынан, харах балыыһатыгар киириэн баҕалаахтартан ыспыраапкалар ирдэнэллэр. Быраастар ыарыһах туругун чопчу билэргэ улахан болҕомто ууруллар.
Ыйытыылар офтальмология үлэтин элбэх өрүттэрин таарыйдылар. Омук сириттэн аҕалыллыбыт харах хрусталлара хайдах быһыылаахтык туруоруллалларын, хамсык кэмигэр балыыһаҕа көрдөрөргө хайдах сурутуохха сөбүн, харах бырааһа буолуоххун баҕарар буоллаххына үөрэххэ ханна барыахха сөбүн уонна да атын ыйытыыларга Иван Луцкан сиһилии хоруйдары биэрдэ. “Оҕолорго өрөспүүбүлүкэ иһигэр эппэрээссийэ оҥороллор дуо?” диэн ыйытыы бэрилиннэ. Бу ыйытыыга балыыһа кылаабынай бырааһа үтүө сонуну иһитиннэрдэ:
— Оҕолору кытта үлэлиир салаабыт хааччахтыыр миэрэлэр көтүллүбүттэрин кэнниттэн, биир бастакынан арыллыбыта. Олунньу 1 күнүттэн оҕо салаата туспа киирэр ааннаах саҥа сиргэ көспүтэ. Оттон эпэрээссийэ туһунан этэр буоллахха, былаан быһыытынан сайыҥҥыттан оҕолору кытта үлэлиир салаа кэҥиэхтээх, онно 1-17 саастарыгар диэри оҕолорго катарактаны, харах кылардыы көрүүтүн көннөрөр эппэрээссийэлэр оҥоһуллар буолуохтара.
Маны таһынан, Иван Петрович вакцина туһунан ыйыттыларга хоруйдаата. “Арассыыйаҕа оҥоһуллар вакцинаны ылан баран ыалдьыахпын сөп дуо?” диэн ыйытыы киирдэ:
— Бу күннэргэ The Lancet научнай сурунаал “Спутник-V” туһунан ыстатыйаны ырытан бэчээттээбитэ. Тутулуга суох эспиэрдэр этэллэринэн, вакцина көдьүүһэ 91,6% буолбут уонна чахчы куттала суоҕун бигэргэппиттэр. Бу олус үчүгэй көрдөрүү. Онон быһыыны ыллаххытына, коронавирус дьаҥар хаптарбат буолуу мэктиэтэ улахан.
Иван Луцкан истээччилэри Госуслуги портал нөҥүө балыыһа өҥөлөрүгэр уонна быһыыны ыларга уочаракка суруталларыгар ыҥырда.
«Саха сирэ» хаһыат, edersaas.ru