Доруобуйа Уопсастыба

Харах балыыһатыгар саҥарар тонометр баар буолла

Аан дойдутааҕы доруобуйа күнүн көрсө Өрөспүүбүлүкэтээҕи офтальмологическай килиниичэскэй балыыһаҕа уонна поликлиника куорпуһугар саҥа аппарааттары туруордулар. Бу аппарааттар дабылыанньаны кээмэйдииллэр, уратылара диэн, саҥанан салаллаллар.

Көрбөт, эбэтэр мөлтөхтүк көрөр дьоҥҥо бу улахан көмө. Кими да кэтэспэккэ эрэ, бэйэлэрэ дабылыанньаларын кээмэйдэнэр кыахтаннылар. Аппараакка тиийэн, илиилэрин уган баран, “измерить давление” дииллэр, оччоҕо бэйэтэ кээмэйдиир уонна пульсу, хаан баттааһынын кээмэйин саҥаран иһитиннэрэр. Кунуопканы баттыыр да ирдэммэт.

Тонометр олус табыгастаах, үлэтэ судургу, киһи сааһыттан, илиитэ суонуттан-ырыганыттан тутулуга суох, бэрт чэпчэкитик, түргэнник кээмэйдиир.

Онон доруобуйаларыгар хааччахтаах дьон олохторун чэпчэтэргэ өссө биир хардыы оҥоһулунна диэн этиэххэ сөп.

Ангелина Васильева, “Саха сирэ” хаһыат, edersaas.ru

Хаартыска: sakhagov.ru

0
0
Telegram @edersaas20