Харах балыыһатыгар оҕолорго аан бастакытын харах эпэрээссийэтэ оҥоһулунна

Өрөспүүбүлүкэтээҕи харах балыыһатыгар аан бастакытын төрүөхтэриттэн катаракталаах кыра оҕолорго эпэрээссийэ оҥордулар.

Бүгүн, сэтинньи 29 күнүгэр, эпэрээссийэлэммит оҕолор балыыһаттан тахсар күннэригэр харах балыыһатыгар тиийдим. Биһигини балыыһа кылаабынай бырааһа Иван Петрович Луцкан көрүстэ. Балыыһа үһүс этээһигэр тахсан эпэрээссийэлэммит оҕолору көрүстүбүт. Эпэрээссийэлэрэ этэҥҥэ ааһан оҕолор палаата иһигэр мэниктии сылдьалларын көрөн киһи үөрэр.
Балыыһа кылаабынай бырааһа Иван Луцкан:
— Урукку өттүгэр биһиги маннык эпэрээссийэни улахан эрэ дьоҥҥо оҥорор этибит. Тоҕо диэтэххэ , улахан дьон местнэй анестезиянан норкуостанар буоллахтарына, оҕолорго атын. Бу сыл саҕаланыыта биһиги балыыһабытыгар салгын оҥорор ыстаансыйаны атыылаһар туһунан сорук туруоруммуппут. Билигин пандемия уустук кэмигэр маннык ыстаансыйа балыыһа ахсын баар буолуохтаах. Эпэрээссийэ оҥоһуллар сиригэр салгыны боллуонтан туттар уустуктардаах. Инньэ гынан, бэс ыйыгар өрөспүүбүлүкэ бүддьүөтүттэн үбүлэнэн салгын оҥорор ыстаансыйа атыыластыбыт. Сэтинньигэ өрүс суолунан ыстаансыйабытын этэҥҥэ аҕалтарбыппыт. Эпэрээссийэ туһунан этэр буоллахха, кырачааннарбыт үстээх уонна түөртээх оҕолор. Харах катарактатын эпэрээссийэтэ уустук. Хас палата ахсын душ, туалет баар. Ыарыһахтарбыт эпэрээссийэ кэнниттэн туох да ыарахаттары көрсүбэттэрин курдук усулуобуйабытын тупсардыбыт.
Эпэрээссийэлэммит  Эрхан сааһа түөрдэ, Таатта улууһун Тыараһа нэһилиэгиттэн кэлбиттэр. Уолчаан ийэтэ Кристина:
—Оҕом төрүөҕүттэн катаракталаах этэ. Ону биһги бу ааспыт күһүн саҥа өйдөөн көрбүппүт. Ытык Күөлгэ балыыһаҕа көрдөрбүппүтүгэр куоракка ыыппыттара. Бүгүн бэһис күммүт, бу сэрэдэҕэ тахсыахтаахпыт. Эпэрээссийэ этэҥҥэ ааста, маҥан халааттаах аанньаларга махталбын тиэрдэбин.

Ульяна ЗАХАРОВА.