Офтальмология өрөспүүбүлүкэтээҕи балыыһатыгар өрөспүүбүлүкэ 100 сылын көрсө Саха сирин худуоһунньуга Мира Аргунова быыстапката тэрилиннэ.
Мира Аргунова-Мира Арт хартыыналара Арассыыйаҕа, Великобританияҕа, АХШ-ка уонна Монголияҕа 50 аан дойдутааҕы, бүтүн Арассыыйатааҕы уонна эрэгийиэннээҕи быыстапкаларга турбуттара. Ону таһынан үлэлэрэ СӨ Национальнай ойуулуур-дьүһүннүүр мусуойга, Алтай Өрөспүүбүлүкэтин А.В.Анохин аатынан национальнай мусуойга уо.д.а. култуура дьиэлэригэр хараллаллар.
Аны билигин Офтальмология балыыһатыгар бастакы этээскэ кини 15 хартыыната көрдөрүүгэ туруорулунна.
«Киһи живопись айымньыларын хараҕын көмөтүнэн толору ылынар. Хараҕа мөлтөөн бардаҕына, биһиги тулалыыр эйгэбитин көрөр дьолу киниэхэ харах быраастара биэрэллэр. Бу бырайыакпыт ускуустубаны көрөөччүгэ чугаһатар курдук көрдөрөр-сырдатар, аныгы живопиһы төһө кыалларынан элбэх киһини чугаһатар соруктаах», -– диэтэ Мира Аргунова.
Офтальмология балыыһата иһитиннэрбитинэн, бырайыак тута ситиһиилэннэ. Оннооҕор экспозицияны бэлэмниир кэмҥэ эмтэнээччилэр худуоһунньукка чугаһаан кэлэн сэһэргэстилэр, хас биирдии хартыына устуоруйатын сэҥээрдилэр, хартыыналары хаартыскаҕа түһэрдилэр.
«Биһиги күүстээх боруобалааһыны оҥордубут -– холлга талааннаах худуоһунньукпут хартыыналарын көрдөрүүгэ таһаардыбыт. «Ускуустуба эмтиир, уопсай тылы буларга көмөлөһөр» диэн этэллэр. Мэдиссиинискэй үлэһиттэрбит дууһалара сылаанньыйарыгар эрэллээхпин. Тоҕо диэтэххэ, кинилэр билигин, эмиэ эмтэнээччилэрбит курдук, харахтарын сымнатыахтара, дууһаларын сынньатыахтара. Маннык санаа миэхэ өссө былырыын киирбитэ. Пандемия бириэмэтэ, мусуойдар онлайн үлэлииллэр, дьон сылдьара аҕыйыыр, оттон, дьиҥэр ускуустубаны дьоҥҥо чугаһатыаҕы баҕарыллар. Балыыһабытыгар тыһыынчанан киһи сылдьар, кинилэр Мира Аргунова айар эйгэтин кытта билсиэхтэрин сөп. Инникитин бу хартыыналар өрөспүүбүлүкэҕэ оҕо тэрилтэлэригэр бэлэхтэниэхтэрэ», -– диэн Офтальмология өрөспүүбүлүкэтээҕи балыыһатын кылаабынай бырааһа Иван Луцкан кэпсээтэ.
Надежда ЕГОРОВА, «Саха сирэ» хаһыат, edersaas.ru
СӨ Доруобуйа харыстабылын министиэристибэтин хаартыскалара