Свердлов уул. 15 нүөмэригэр баар Харах өрөспүүбүлүкэтээҕи балыыһатын поликлиниката биир ыйга «аһаҕас аан күннэрин» биллэрэрин, онно кэлэн босхо көрдөрүнүөххэ сөбүн туһунан сурах батсаап ситимигэр тарҕанна.
Биллэрии кырдьыгын-сымыйатын билээри «Саха сирэ» хаһыат суруналыыстара поликлиника дьаһалтатыгар эрийэ сырыттыбыт. Харах өрөспүүбүлүкэтээҕи балыыһатын кылаабынай бырааһын солбуйааччы Ираида Иннокентьевна Гаврильева бу сурах оруна суоҕун бигэргэттэ. Поликлиника дьыл кэмиттэн уонна нэһилиэнньэҕэ төһө табыгастааҕынан көрөн, итинник акциялары ыытар үгэстээх. Онон бу урут тарҕаммыт биллэрии буолан биэрдэ.
Кырдьыга да, аам-даам тымныы түһээри турдаҕына, сымыйа сураҕы итэҕэйэн, поликлиникаҕа тиийэр манан дьыала буолбатах.
Ол гынан баран, офтальмолог-быраас өҥөтүгэр наадыйар тирээн кэллэҕинэ, исписэлиистэргэ көрдөрөргө окулистан направление ылыахха, паспордаах, страховка сибидиэтэлистибэлээх, полистаах кэлиэххэ сөп. Баҕарар буоллахха, төлөбүрдээх өҥөлөрүнэн туһаныахха эмиэ сөп.
Надежда ЕГОРОВА