Өрөспүүбүлүкэтээҕи офтальмологическай балыыһаҕа көрдөрүнэргэ улахан уочарат, анньыһыы-үтүрүһүү суох, пациеннары регистратураттан ыла кэбиниэттэринэн сирдээһин, үлэ кыраапыга чуолкайдык оҥоһуллубут.
Тумуу, дьаҥ элбээбит кэмигэр харах балыыһата үлэтин тохтоппот. Балаатаҕа ыарыһахтар үстүү буолан сыталлар. Күҥҥэ хаста да дезинфекция ыытыллар, сууйаллар-сотоллор.
Харыстанар миэрэлэри кытаанахтык тутуһаллара оруннаах – харах балыыһатыгар үксүгэр кырдьаҕас дьон кэлэн көрдөрүнэллэр, эмтэнэллэр. Сетчатка чарааһаан хоҥнон кэлиитэ, глаукома, катаракта курдук ыарыылар сааһырбыт дьону буулууллар. Маныаха үрдүк квалификациялаах быраас көмөтө ирдэнэр, сороҕор эппэрээссийэ эрэ көмөлөһөр. Онон, харах моһуогурдаҕына, уталыппакка көрдөрүнүөххэ наада.
Пандемия кэмигэр офтальмологическай балыыһаҕа поликлиникаттан “направление” ылбакка да эрэ кэлэн, көрдөрүнүөххэ сөп. Аан бастаан (84112)500-707 төлөпүөнүнэн эрийэн, суруйтаран эрэ баран, тиийэҕит. Мааскалаах, бэрчээккилээх кэлии ирдэнэр.
Ангелина Васильева, “Саха сирэ” хаһыат, edersaas.ru