Харабыыны атыылаһар аны судургутуйуо уонна ахсаана икки төгүл элбиэ
РФ “Саа-саадах туһунан” сокуонугар уларытыылары киллэрэр сокуон барыла Госдуума дьокутааттарын көрүүлэригэр сылдьар. Чопчу эттэххэ, уларытыы буулдьа сааны атыылаһыыны судургутутууга уонна биир киһиэхэ көҥүллэнэр саа ахсаанын элбэтиигэ сыһыаннаах.
Холобур, билигин үлэлиир быраабыланан буулдьа сааны атыылаһары доруоп сааны кырата 5 сыл бас билэн илдьэ сылдьыбыт, туттубут киһиэхэ көҥүллүүр буоллахтарына, бу болдьох 3 сылга диэри кылгатыллара көрүллэр, ол эбэтэр доруоп сааны регистрациялаппытыҥ 3 сылтан таҕыстар эрэ булт маҕаһыыныттан таптаабыт харабыыҥҥын атыылаһар кыахтанаҕын.
Иккиһинэн, билиҥҥи быраабыланан дьиэҕэр 5 доруоп уонна биир итиччэ буулдьа саалары уурарыҥ-харайарыҥ көҥүллэнэр эбит буоллаҕына, бырайыак ааптардара саа ахсаанын икки төгүл эбэргэ, ол аата 20 көҥдөйгө диэри көҥүллүүргэ этэллэр. Бу уларытыыга, биллэн турар, коллекционердар үөрүөхтэрэ. Оттон спортсменнарга анаан эмиэ сымнатыы көрүллэр, маҕаһыынтан ботуруон атыылаһарга хааччах суох буолуоҕа. Итиэннэ саалаахтарга барыларыгар туһалаах буолуон сөп өссө биир уларытыы киириэҕэ: сааҥ алдьанар эбэтэр дьиэктээх түбэлтэтигэр оҥоһуллубут собуотугар эрэ ыытан өрөмүөннэтэриҥ ирдэниллэрэ аны тохтуур, киһи бэйэтэ эбэтэр олохтоох ууска, маастарга көрдөрөн көннөртөрөрө көҥүл буолуо.
Владимир ПРОКОПЬЕВ, Ил Түмэн сир сыһыаннаһыыларыгар, айылҕа баайыгар уонна экологияҕа сис кэмитиэтин бэрэссэдээтэлэ:
— Россия үрдүнэн сотору кэминэн булт минимумун туттарыы киллэриллээри турар. Ол, биллэн турар, төлөбүрдээх уонна саҥа сааланааччыларга быраабылата кытаанах буолуоҕа. Онон, буулдьа сааны атыылаһыыны көҥүллүүр болдьоҕу кылгатыы сөптөөх дии саныыбын. Оттон саа ахсаанын эбии чопчу коллекционердарга сыһыаннаах. Уопсайынан, булка уонна сааны туһаныыга элбэх уларытыы, көннөрүү киллэриллэрэ күүтүллэр. Ол барыта сокуону кытаатыннарыы өттүгэр ылыллыаҕа.
Василий НИКИФОРОВ, edersaas.ru