«Хараас амнистията»: Росреестр методическай сүбэ босуобуйатын оҥордо
Балаҕан ыйын 1 күнүттэн «Арассыыйа Федерациятын сокуону таһаарар кэккэ аакталарыгар уларытыылары киллэрэр туһунан», судургутук эттэххэ «хараас амнистиятын» туһунан 79 №-дээх федеральнай сокуон олоххо киириэҕэ.
edersaas.ru
Росреестр бу сокуону көрсө дьоҥҥо-сэргэҕэ бэрт тиийимтиэ тылынан хараас эбийиэктэрин уонна кинилэр турар сирдэрин учаастагар бас билии боппуруостарын сааһылыырга анаммыт методическай сүбэ босуобуйатын оҥордо. Манна «хараас амнистиятын» сокуонун көдьүүстээхтик туһаныы аҕыс хардыыта бэриллэр. Сокуон чопчу ханнык түгэннэргэ дьайара, онно ханнык докумуоннар ирдэнэллэрэ быһаарыллар.
Хараас турар сирин учаастага да, докумуона да суох, кадастр учуотугар тура илик түбэлтэтигэр, бастатан туран, ол сир учаастагын кыраныыссатын схематын бэлэмнээн баран, боломуочуйалаах уоргантан сир учаастагын ылыыга барыллааһын сөбүлэҥ ылыллар. Иккиһинэн, кадастр инженерэ сир учаастагар межевой былааны уонна хараас тэхиньиичэскэй былаанын оҥорор. Үсүһүнэн, гражданин сир учаастагын биэрии туһунан барыллааһын сөбүлэһиини, сир учаастагар ЕГРН быыпыскатын, хараас тэхиньиичэскэй былаанын нэһилиэнньэлээх пуун дьаһалтатыгар биэрэр. Онно олоҕуран, дьаһалта бу киһи харааһыгар анаан сир учаастагын босхо биэрэр туһунан быһаарыыны таһаарар. Методическай босуобуйаҕа сокуону олоххо киллэриигэ судаарыстыбаннай уонна муниципальнай былаас уорганнарын боломуочуйалара барыта дьэҥкэтик суруллубут. Ол иһигэр гражданнар харааска уонна хараас турар сирин учаастагын докумуонун оҥортороллоругар муниципалитет туох эбээһинэстээҕэ ыйыллыбыт.
Бу сокуону олоххо киллэриигэ бэлэмнэнии үлэтэ Саха Өрөспүүбүлүкэтигэр ыытыллыбыта балачча буолла. Күн бүгүн өрөспүүбүлүкэ үрдүнэн 10 тыһыынчаттан тахса эбийиэк «хараас амнистиятыгар» хабыллар кыахтааҕын туһунан Росреестр Саха Өрөспүүбүлүкэтигэр управлениетын салайааччы Ольга Егорова бэлиэтиир. Методическай сүбэни https://disk.yandex.ru/d/wzl5xArS_pFCSg сайтка көрүөххэ сөп диэн Росреестр иһитиннэрэр.
Раиса Сибирякова, «Саха сирэ» хаһыат, edersaas.ru