Бүгүн Ил Дархан өрөспүүбүлүкэтээҕи офтальмологическай килиниичэскэй балыыһаҕа сырытта, күннээҕи үлэни кытта билистэ.
«Төһө да сыстыганнаах дьаҥ бүрүүкээн турдар, эмтиир тэрилтэ үлэтин олох тохтоппокко үлэлээн кэллэ. Өрөспүүбүлүкэ араас улуустарыттан кэлбит ыарыһахтар тустаах көмөнү кэмигэр ыла олороллор.
Мин балыыһаҕа ыарыһахтары кытта көрсүһүүбэр, эмтэнии усулуобуйата үчүгэйин бэлиэтээтилэр. Саха сирин офтальмологията мэдиссиинискэй өҥөнү оҥорууга саҥа таһымҥа таҕыста. Ол курдук, Алдаҥҥа Нерюнгригэ уонна Дьокуускайдааҕы Мэдиссинэ киинигэр баар филиалларга 53 мөлүйүөн солкуобай суумалаах саҥа аныгы технологиянан оҥоһуллубут тэриллэр тиийдилэр. Бу маннык офтальмология салаатын аныгы аппарааттарын дойду киин клиникаларыгар тутталлар. Маны тэҥэ, икки наркозтуур, ИВЛ аппарааттар уонна саҥа лазер кэллэ. Ити курдук, аныгы тэриллэринэн хааччыллыы үлэтэ 2022 сылга эмиэ салҕаныаҕа. Офтальмология балыыһатын исписэлиистэрэ үрдүк категориялаах эмчиттэр быһыытынан дойдуга тиийэ билиннилэр. Кинилэр үлэлэрин уопутун тарҕатан, атын эриҥийиэннэр быраастарын үөрэтэр буоллулар», — диэн Ил Дархан «Телеграмыгар» суруйда.
Елена ПОТОЦКАЯ, «Саха сирэ» хаһыат