Дьокуускайдааҕы Харах балыыһатыгар коронавируһунан 48 киһи сутулунна.
edersaas.ru
Ыалдьыбыт дьону кытта 679 хантаахтаах киһини буллулар. Манна СOVID-19 дьаҥынан бастакы ыалдьыбыт 4 киһини (быраас, эмчит уонна икки санитарка) муус устар 26 күнүгэр булбуттара. Ол эрээри ыарыыны бастааҥҥыттан сыһыарбыт киһи билигин да көстө илик.
— Уопсайынан, бастакы хантаактаах дьону буларга олус уустугурда. Ол эбэтэр ыарыы бэйэтин үгүс дьоҥҥо биллэрбэт. Куттала ол баар. Ол эбэтэр дьиэҕэ олоруу эрэсиимин тутуспат, харыстанар маасканы, бэрчээккини кэппэт дьон төһө баҕарар киһини сутуйуохтарын сөп, – диэн бэлиэтиир доруобуйа харыстабылын миниистирэ Елена Борисова.
Билигин ыалдьыбыт 48 киһи, ол иһигэр медперсонал, кинилэр дьиэ кэргэттэрэ уонна ыарыһахтар инфекционнай стационарга сыталлар. Биир киһи икки өттүнэн сэбиргэхтэппит. Ол киһи туруга — орто ыарахан. Атыттар ыарыыга чэпчэкитик хаптарбыттар. Туруктара — этэҥҥэ.
679 хантаахтаах дьон анаалыстарын туттара сылдьаллар. Сорохтор Харах балыыһатыгар тэриллибит обсерваторга бааллар. Атыттар дьиэлэригэр олорор эрэсиими тутуһаллар. Бу дьон сыстыганнаах дьаҥ бастакы киһиэхэ булуллуон иннинэ балыыһаттан тахсыбыттар.
СOVID-19 дьаҥа булуллубут Нам улууһун олохтооҕо Харах балыыһатыттан муус устар 26 күнүн иннинэ тахсыбыт.
Харах балыыһатыгар тустаах дезинфекция ыытыллынна. Ыксаллаах түгэн буолар түбэлтэтигэр офтальмология кэбиниэтэ 2 №-дээх Өрөспүүбүлүкэтээҕи балыыһаҕа — Суһал көмөнү оҥорор кииҥҥэ аһылынна.
Ил Дархан Айсен Николаев бэлиэтээбитинэн, Харах балыыһатыгар тустаах силиэстийэ бара турар.
Елена ПОТОЦКАЯ, «Саха сирэ» хаһыат, edersaas.ru
Хаартыска интэриниэттэн.