Тыа хаһаайыстыбата

Хара отчуттара уу кытыытын элитиэпкэнэн охсоллор

Аһыҥаттан уонна кураантан былдьасыһа-тарысыһа бастакынан отторун охсубут отчуттар, эмискэ кэлбит ардахтар кэннилэриттэн, куурбут отторун таһар түбүгэр сылдьаллар.

edersaas.ru

Охсооччу охсор, мунньааччы мунньар. От ыйын 15 күнүн былыттаах халлаанын анныгар 6 гаалаах, Хара бөһүөлэгиттэн түөрт хас килэмиэтирдээх, Төлөктөйгө Плотниковтар отторун тиэйэ сылдьаллар. Эргэ «Беларусь» от соһон дьиэлиирин кэтэһэн иһийэн турар. Отторун чөмөхтүү-чөмөхтүү бырысыапка атырдьаҕынан аҕалан быраҕаллар. Күөлүн кытыытын илиинэн элитиэпкэ хотуурунан охсубуттар, уоннааҕытын  «Taishan» тыраахтардарынан.

От ыйын 8 күнүттэн оттооһуну саҕалаабыппыт. Икки күн охсубуппут кэннэ, ардахтар мэһэйдээннэр тохтообуппут, ‒ диэн кэпсиир кырдьаҕас отчут Валерий Плотников. ‒ Уутун кытыытын иккиэ буолан охсубуппут. Сыл аайы илии хотуурун туһанабыт. Улахан тыраахтарынан мустарабыт, тиэйэбит. Далга биир улахан кэбиһиини кэбиһэбит. Уолум эмиэ бэйэтэ хаһаайыстыбалаах, сүөһүлэрдээх. Барыта холбоон сэттэ сүөһүнү кыстаппыппыт, билигин, ньирэйдэрдиин 11 сүөһүлээхпит. Түөрт ынахпыт ыаталлар. Бу алаастан чугас баар Эмис Күөлгэ барыахпыт. Онно оттооччулар бааллар.

Төлөктөйгө төрдүө буолан отторун тиэнэ сылдьаллар: Валерий Иннокентьевиһы кытта уола, нэһилиэк баһылыгын солбуйааччы, уоппускатыгар барбыт Василий Валерьевич, кэргэнин быраата Денис Григорьев уонна Павловскайтан көмөлөһө кэлбит, алтыс-сэттис сылын оттооһуҥҥа көмөлөһөр, кийиитин быраата Семен Павлов. Валерий Плотников улахан уола, палеонтолог, биологическай наука хандьыдаата Валерий Валерьевич эмиэ Дьокуускайтан кэлэн оттоһор эбит да, билиҥҥитэ, кэлэ илик. Аҕата этэринэн, сураҕа, Абый улууһугар түҥ былыргы носорог оҕото көстөн, онно барбыт.

Уоллаах аҕа Плотниковтар сүөһүлэрин 2000 с. тутуллубут холлоҕос хотоҥҥо кыстаталлар. Күһүн үс сүөһүнү туттубуттар. Былырыын 20 т оту оттообуттара, икки туоннаттан тахса ордубут. Быйыл үүнүүтэ мөлтөх соҕус буолбут диэн сыаналыыр. Аһыҥа да күүскэ ыспыт. Кыстыкка 18 туоннаттан итэҕэһэ суоҕу оттуохтаахтар. Майаттан уонна Хараттан чугас Туустаахха эмиэ кыра оттуур сирдээхтэр. Валерий Плотников ардахтар кэннилэриттэн бэттиэмэ үүнэ сатаатар диэн баҕалаах.

Майаттан Аркадий Иннокентьев, «Саха сирэ» edersaas.ru сайтка анаан

0
0