Ахсынььы 13 күнүгэр Выборг куоракка «Окно в Европу» киинэ бэстибээлэ түмүктэннэ. Куонкурус араас хайысхатынан барыта 70 киинэ кыттынна.
Куонкурус биир хайысхатын сүрүн бирииһин уонна «Продюсер үлэтин иһин» диэн анал бирииһи Саха сириттэн Степан Бурнашев режиссердаах «Хара хаар» киинэ ылла.
Киинэҕэ уһун айан суоппарын Гоша туһунан көстөр. Кини Саха сирин хоту улуустарыгар таһаҕас тиэйэр. Бу киинэни кэлэр сыл тохсунньу 29 күнүттэн Саха сирин бары киинэ тыйаатырдарыгар көрүөхпүт.
Эрдэ биһиги саайтпытыгар киинэ режиссера Степан Бурнашев маннык кэпсээбитэ:
— «Хара хаар» киинэни чопчу биир түбэлтэҕэ эрэ олоҕуран уһулбатыбыт. Үксүн айан, суол туһунан буолуо. Ону кытта сибээс кыһалҕаларын эмиэ таарыйдыбыт. Жанра — триллер, драма. Сценарийын бэйэм суруйбутум. Сүрүн оруолу Үүнэр көлүөнэ тыйаатырын артыыһа, идэтийбит артыыс Федот Львов толорор. Киинэни ааспыт сыл олунньу, кулун тутар ыйдарыгар Дьокуускайга, Кэбээйигэ, Мэҥэ Хаҥаласка, Уус Алдан сиринэн Өлүөнэ өрүскэ устубуппут. Маныаха үксүн түүн үлэлээбиппит. Ыарахан соҕус киинэ диэн эрдэттэн көрөөччүлэрбин сэрэтэбин.
Киинэ тизерин көрүҥ:
edersaas.ru