Атыы-эргиэн кииннэрэ чэпчэки сыананан дьону угуйан, табаардарын атыылаан, барыстарын элбэтэ сатаан аахсыйа арааһын толкуйдууллар. 30-50% чэпчэтиллибит таҥаһы-сабы, туттар тэрили көрдүбүт да аҥаар кырыытыттан харбыалаһан иһэбит, киһи оннук айылгылаах. Онтон дьиэбитигэр аҕалан баран, кэппэккэ ыскаап түгэҕэр да сытыарыахпытын сөп.
Аатырбыт «хара бээтинсэни» маркетологтар аан бастаан Эмиэрикэҕэ Махтал күнүгэр (День благодарения) сэтинньи төрдүс бээтинсэтигэр толкуйдаабыттара. Бу бэлиэ күн кэнниттэн, саамай сырдык бырааһынньык Ороһооспо кэмэ саҕаланар. АХШ олохтоохторо сэтинньи бүтэһик бээтинсэтигэр маҕаһыын кэрийэр идэлээхтэр. Былырыын кырата 160 мөлүйүөн киһи биирдии бэйэлэрэ 485 дуолларга атыыласпыттар. Маҕаһыыннар биир күн 78 миллиард дуоллары киллэрбиттэр.
Оттон Арассыыйа олохтоохторо омуктары үтүктэн, былырыын биирдии бэйэлэрэ 9000 солкуобайга атыыласпыттар. 2018 сылга 135,5 миллиард солкуобайы араас маҕаһыыннарга бараабыттар.
Интэриниэт маҕаһыыннар бу күн эмиэ 12 миллиард солкуобайы оҥорбуттар. Ол эрээри, ымсыы оботугар суобаһа суох түөкүттэр аатырбыт бренд маҕаһыынын саайтын үтүгүннэрэн ылан, фейковай саайт оҥорон, дьону албынныыллар. Кинилэр сымыйа саайтарыгар киирбит дьон каарталарын куодун устан ылан, былырыын 250 мөлүйүөн солкуобайы уорбуттар. Ол туһунан “МК.RU» иһитиннэрэр https://www.mk.ru/economics/2019/11/28/raskryt-fenomen-chernoy-pyatnicy-deneg-net-no-tratit-budem.html
«Саха сирэ», edersaas.ru