Мэҥэ Хаҥалас улууһун Хара сэлиэнньэтигэр тутуу күүскэ ыытыллар, кэнники сылларга 40 чааһынай дьиэ тутулунна.
Үрдьүҥэхтээх түөлбэтигэр 124 саҥа уһаайба сирэ бэрилиннэ. Ыччаттар дойдуларыгар олохсуйан, араас үлэни-хамнаһы тэрийэллэр. Ол курдук, кэнники үс сыл устата сэттэ эдэр киһи үлэлэрин саҥа саҕалыыр бааһынайдары өйүүр федеральнай бырагырааманан грант ыланнар, төрүт үгэстэри сайыннарыыга үлэлии-хамсыы сылдьаллар.
Нэһилиэк 195 сылын көрсө олохтоохторго дьоһун үөрүү тосхойдо — “Тыа сирин 2014-2017 сс. уонна 2020 сылга диэри кэмҥэ бигэтик сайыннарыы” тус сыаллаах федеральнай бырагырааманан оҕо саадын, гааһынан үлэлиир хочуолунайы уонна суолу-ииһи кэлим тутуу бырайыага саҕаланна! Барыта 262 мөл. солк. суумалаах тутуу үс сиртэн: федеральнай бүддьүөттэн, өрөспүүбүлүкэттэн уонна олохтоох дьаһалтаттан үбүлэнэр. Быйылгы сылга 79 мөл. солк. көрүлүннэ.
Оҕо саадын дьиэтэ 90 миэстэлээх буолуоҕа, 2018 сыл алтынньы 1 күнүгэр диэри үлэҕэ киллэриллиэҕэ. Тутууга эппиэттээҕинэн «Арктика-строй» ХЭТ (генеральнай дириэктэр Игорь Никифоров) талыллан, үлэтин саҕалаата. Билигин сыбаайалары түһэрэ сылдьар.
Нэһилиэк дьаһалтатын баһылыга Дарья Назарова бэлиэтээн этэринэн, улуус баһылыга Николай Старостин, өрөспүүбүлүкэ Бырабыыталыстыбатын Бэрэссэдээтэлин бастакы солбуйааччы – тыа хаһаайыстыбатын уонна ас-үөл бэлиитикэтин миниистирэ Петра Алексеев кыһамньыларынан, Ил Дархан Егор Борисов өйөбүлүнэн бу бырайыак Россия Тыатын хаһаайыстыбатын министиэристибэтин улахан куонкуруһун ааһан, бырагыраамаҕа киллэриллэрэ ситиһиллибит.
Раиса СИБИРЯКОВА, “Саха сирэ” хаһыат, edersaas.ru