От үлэтин былдьаһыга. Сопхуос звенота саҥа сиргэ кэлэн, былааннарын эрдэлээн толорон иһэр буоланнар сорохтор бөһүөлэктээтилэр.
Онон аҕыйах киһи хаалан, балааккаларын туруоран, аһаан-сиэн утуйардыы тэриннилэр. Баһылайдаах Барыыс дьонноро баран биир балааккаҕа иккиэн хонор буоллулар. Баһылай сытаат да, мунна тыаһаабытынан киирэн барда. Барыыс ону-маны саныы, эргийэ-урбайа сытта. Арай туох эрэ тыаһыырын истэн өндөйөн одууласпыта, балаакка түннүгүн имик-самык сырдыгар туох эрэ киһи моһуоннаах барыҥныыр үһү. Баһылай диэҕин, киһитин муннун тыаһа муораҕа. Лунатиктыыр да кыаҕа суох утуйа сытар.
“Бай, хайалара киирдэҕэй?” — диэн анараа балааккаҕа хаалбыт отчуттары күтүрээтэ. “Ээ, тугу гына сылдьаҕын?” — диэн сибигинэйэн ыйытта. Киһитэ кырдьык-хордьук таһырдьа тахсан барда. Ааны саппакка утуйбут диэн Барыыһыгар кыыһыра санаата да, сүрэҕэлдьээн туран саппата.
Арай өр-өтөр буолбата, таһырдьа киһи саҥата сарылаата да, Кириискэ уол сулбу ойон киирдэ. Утуйбуттуун-уһуктаҕастыын олоро биэрдилэр, суугунаһыы буолла. Киһилэрэ “абааһы сылдьар” диэн бөтүөхтүүртэн атыны саҥарбат. Чүмэчи умаппыттарыгар уоскуйбут курдук буолла. Кэпсээнэ диэн маннык. Уол чэпчэтинэ тахсыбыт. Арай көрдөҕүнэ, сөҕүрүтэн хаалларбыт уоттарын таһыгар киһи күлүкүччүйэр үһү. Утуйбакка, хайалара сырыттаҕай, диэн чэпчэтинэн баран тиийбит. Умса түһэн, тугу эрэ букунайа олорор киһини, “хайа, тугу гынаҕын” диэн баран таарыйбыт, онто доҕор атын күтүр үһү–тилир гынаат, хараҕыттан сүтэн хаалбыт. Кириискэ, бэйэтэ да омуннаах киһи, сарылыы түспүт. Ону истээт, Баһылай этэ тымныйан ылла. Ол күтүр олох да балааккаларыгар киирэ сылдьыбыт буолбат дуо.
Кэлин истибиттэрэ, урут сэрии саҕана манна олохтоох биир киһи сэриигэ барымаары моҥнон өлбүтэ үһү. Ол сылдьара буолуо диэбиттэр.
Антонина Эверстова