Хапытаалынай өрөмүөн усунуоһун төлөөбөтөхтөр кыбартыыраны атыылыыллара уустугуруо

    Аҕыйах сылтан бэттэх элбэх кыбартыыралаах дьиэҕэ олорооччулар хапытаалынай өрөмүөҥҥэ усунуос төлүүллэр. Ол гынан баран, сорохтор сүгүн-саҕын төлөөбөттөр.

Александр ТАРАСОВ, «Саха сирэ» хаһыат, https://edersaas.ru

Кинилэри туох күүтэрий?

Бастакытынан, хапытаалынай усунуоһу төлөөбөккө сылдьааччылар коммунальнай өҥө субсидиятын туһамматтар.

Иккиһинэн, иэстэригэр күн аайы пеня ааҕыллар.

Үсүһүнэн, иэстээх киһи дьиэтин атыылыырыгар ыарахаттары көрсөр.

Төрдүһүнэн, 4000-тан тахса солк иэстээхтэргэ иэһи төлүүллэригэр аналлаах ирдэһэр үлэлэр ыытыллаллар. Ол курдук, элбэх кыбартыыралаах дьиэлэри өрөмүөннүүр пуондаттан иэһи төлүүргэ суут иннээҕи анал иһитиннэрии тигинээн кэлэр. Ити кэнниттэн хаһаайын сөптөөх дьаһалы ылымматаҕына, салгыы суут кыттыһар.

Татьяна Шигапова, СӨ элбэх кыбартыыралаах дьиэни өрөмүөннүүр пуонда генеральнай дириэктэрин экэниэмикэҕэ уонна үпкэ солбуйааччы:

— 50 кв м иэннээх кыбартыыралаах киһи ый аайы 300 солк. төлүүр. Ол аата 1 кв м иһин 6 солк. Ол аата сылга 3600 солк төлүүр.

2016 сылга өрөспүүбүлүкэ үрдүнэн усунуоһу төлөөбөккө сылдьааччыларга 1800 ирдэһэр дьыала тэриллибитэ. Бу суумата 43 мөл. солк тэҥнэһэр. Итини тэҥэ, 889 тыһ. солк ирдэһэр сайабылыанньаны биэрбиппит. Ити суумалар барыта төлөммүттэрэ уонна 226 тыһ. солк дьон баҕа өттүнэн төлүүргэ күһэллибитэ. Оттон суут кыттыытынан 663 тыһ. солк быһаарыллыбыта.

2017 сылга өрөмүөн усунуоһун төлөөбөттөргө ирдэһэр үлэни өссө күүһүрдүөхпүт. Онон кыбартыыра хаһаайыннара, төһө кыалларынан, усунуоһу кэмигэр төлүүргүтүгэр сүбэлиибит.