Арассыыйа Үөрэҕириитин миниистирэ Сергей Кравцов оскуолаларга “Үөрэҕи сайыннарыы” хапытаалынай өрөмүөн бырагырааматын Карелия Өрөспүүбүлүкэтигэр сылдьан аста.
Санатан эттэххэ, “Үөрэҕи сайыннарыы” судаарыстыбаннай бырагыраама иитинэн 2026 сылга диэри дойду үрдүнэн 7,3 тыһ. оскуола тутуутун өрөмүөннүөхтээхтэр. Саха сирэ тустаах бырагырааманан 2022 уонна 2023 сылларга дойду хааһынатыттан 2 млрд. 842 мөл. 921 тыһ. солк. субсидия ылыаҕа. Федеральнай испииһэккэ Саха сирэ сайаапкаласпыт 58 үөрэх эбийиэгэ барыта хапсыбыта. Бу — бастакы сылга. Хапытаалынай өрөмүөн 200-тэн тахса оскуолаҕа эрэйиллэр диэн СӨ Үөрэҕин уонна наукатын министиэристибэтигэр иһитиннэрэн тураллар.
Былаан быһыытынан бырагыраамаҕа өрөмүөн эрэ буолбакка, анал тэрили атыылаһыы, учууталлар идэлэрин таһымын үрдэтии эмиэ киириэхтээх. Бырайыак аһаҕас буоларын туһугар үөрэнээччилэр уонна учууталлар хото кытталлара эрэйиллэр диэн этэллэр.
Людмила ПОПОВА, “Саха сирэ” хаһыат, edersaas.ru
Хаартыска: СИА