Бүгүн, кулун тутар 5 күнүгэр, сайтпытыгар «Хаптаҕайга икки оҕо тумнаһынна» диэн иһитиннэриибит бэчээттэммитэ. Бу чахчынан холуобунай дьыала тэриллибитин туһунан РФ Силиэстийэлиир кэмитиэтин Саха сиринээҕи управлениета иһитиннэрдэ.
Санатар буоллахха, бу алдьархай кулун тутар 3 күнүгэр Мэҥэ Хаҥалас улууһун Хаптаҕай сэлиэнньэтигэр тахсыбыта. Ити күн Хаптаҕай сэлиэнньэтин биир дьиэтигэр икки оҕо — 10 саастаах уол уонна 14 саастаах кыыс — өлүктэрэ көстүбүтэ. Силиэстийэ сабаҕалыырынан, оҕолор гаастан үгээрдээн өлбүттэр. Бу чахчынан силиэстийэ уорганнара процессуальнай бэрэбиэркэ саҕалаабыттара. Өлүүнү аҕалбыт массыынаны экспертизаҕа ыыппыттара.
Барыллаан быһаарыынан, ити күн ыал аҕата табаарыһын кытта балыктыы барбыттар, ойоҕо үс оҕотун кытта дьиэҕэ хаалбыттар.
Ыалдьыттара — дьиэлээх хаһаайын табаарыһа — «Тойота Кроун» массыынатын гарааска туруорбут, гараас буоллар, дьиэҕэ сыста тутуллубут. Онуоха бу киһи массыынатын температура -5 кыраадыска диэри тымныйдаҕына, бэйэтэ собуоттанан кэлэрин гына туруоран барбыт. Ол эбэтэр, массыына сылыйбытын кэнниттэн двигателэ бэйэтэ арахсыахтаах эбит.
Сарсыныгар, кулун тутар 4 күнүгэр, аҕалара күнүс балыктаан кэлбитэ — дьиэ аана иһиттэн хатааһыннаах, икки оҕото өлөн сытаахтыыллар, оттон ойоҕун кытта 8 саастаах уолчаана эмиэ үгээрдээннэр, балыыһаҕа киллэриллибиттэр. Табаарыһын массыыната гарааска сол курдук собуоттанан турар эбит.
Процессуальнай бэрэбиэркэ түмүгүнэн, холуобунай дьыала РФ Холуобунай кодексатын 109-с ыст. 3-с чааһынан, ол эбэтэр, иккиттэн элбэх киһини сэрэҕэ суохтан өлүүгэ тиэрдии бэлиэтэ баарынан, тэрилиннэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн