МэҥэХаҥалас улууһун Хаптаҕайыгар бэртээхэй ыалга ыалдьыттаан кэллим.
edersaas.ru
5 оҕолоох Игнатьевтар ийэлэрэ Татьяна Витальевна балыыһаҕа санитарканан үлэлиир. Аҕалара Михаил Михайлович, комбикорм оҥорор собуот сабыллан, үлэтэ суох олорор. Ол эрээри уһанар буолан, күн солото суох киһи.
Игнатьевтар дьиэлэрэ ыраахтан дьэрэкээн оһуорунан киһи болҕомтотун тардар. Дьиэлэрин тээбириннэрэ: аһыыр остуол, олоппос, ыскамыайка, сибэкки иһиттэрэ — эмиэ бэйэ оҥоһуга. Кэргэнниилэр иккиэн уопсай туһалаах дьарыктаахтар. Ол курдук, хаптаһынтан, фанераттан дьиэ миэбэлин, атын туттар малы-салы оҥороллор. Бу оҥоһуктарынан икки быыстапкаҕа кыттыбыттар.
Ыал ийэтэ соторутааҕыта Дьокуускайга Сомоҕолоһуу сылыгар аналлаах «Иккиэн биирдэр, игирэлэр иккиэлэр» диэн игирэлэр өрөспүүбүлүкэтээҕи куонкурустарыгар игирэ Эльдарын уонна Эвелинатын илдьэ сылдьыбыт. Кини «Кыһамньылаах күн күбэй ийэ» диэн анал аакка тиксибит туоһу суругун киэн туттан көрдөрдө.
Төрөппүттэр уһанар үлэлэригэр оҕолоро быһаччы кытталлар, улахан көмөнү онорор эбиттэр. Миэбэли, атын ханнык баҕарар малы-салы оҥорорго кээмэйдээн, суот-учуот оҥоруу — кинилэр үлэлэрэ. Оҥоһуктары кырааскалааһын, лаахтааһын эмиэ оҕолорго сүктэриллэр.
Оҕону дьиэ кэргэҥҥэ иитии туһунан ыал ийэтэ Татьяна Витальевна санаатын бу курдук үллэһиннэ:
— Оҕо хайаан да режимнээх буолуохтаах. Биһиги оҕолорбутун дьиэлэригэр сөпкө, этиллибит бириэмэҕэ баар буолалларын ирдиибит. Оскуоланы кытта ыкса сибээһи тутуһа сатыыбыт. Улаатан эрэр оҕолору кытта сөптөөхтүк сыһыаннаһыыга, алтыһыыга учууталларбыт, чуолаан психологпыт улахан көмөлөөхтөр. Кыргыттарым улаатан, көмө дьон буолан, күнү быһа үлэбэр сылдьар кэммэр, дьиэни-уоту бэйэлэрэ көрөллөр-истэллэр.
Саалаҕа саамай көстүүлээх сиргэ Игнатьевтар бэйэлэрэ оҥорбут сахалыы оһуордаах-мандардаах истиэндэлэригэр дьиэ кэргэн араас күрэхтэргэ ылбыт туоһу суруктара көстүүгэ ыйаммыттар.
Холобура, «Ыһыах саргылаах таҥаһа» диэн саха таҥаһын көрүү күрэҕэр бу ыал II истиэпэннээх лауреат эбит. «Дьиэ кэргэн — биир сомоҕо» диэн ыал бырайыагын көрүү куонкуруһугар «Бастакы таһымнаах кыайыы» анал ааты ылбыттар. «Саҥа кэми биһириибит, сайдыы суолун тутабыт» диэн девизтээх 62-с төгүлүн ыытыллар уус-уран быыстапкаҕа аҕалара Михаил Михайлович лауреат аатыгар тиксибит.
Игнатьевтар дьиэ кэргэннэрэ өрүү бу курдук олох инники күөнүгэр сылдьыахтара, төрөөбүт төрүт түөлбэлэригэр, нэһилиэктэригэр туһалаах, дьоһун ыччаттары иитэн таһаарыахтара диэн эрэнэбин.
Тамара ВИНОКУРОВА,
Дьокуускай к.
Ааптар хаартыскаҕа түһэриитэ.
«Саха сирэ» хаһыат, edersaas.ru