Хаптаҕай нэһилиэгин олохтооҕо Дмитрий Жирков иллэрээ сыл саҥа саҕалыыр бааһынай хаһаайыстыбаларга көрүллэр федеральнай бырагырааманан грант ылан, улахан хотон тутунна.
edersaas.ru
Дмитрий 2 мөл. 750 тыһ. солк. суумалаах гранынан хотон туттарбыт, оту охсор, мунньар, суулуур тэриллэри уонна 40 сүөһүнү атыыласпыт. Билиҥҥитэ эт хайысхатыгар үлэлиир, хаһаайыстыбатын кэҥэтинэр кыахтаннаҕына, үүтү ыаһыҥҥа да ылсар санаалаах. Алтынньы тиһэх күнүгэр Мэҥэ Хаҥалас улууһун тыатын хаһаайыстыбатын управлениетын начаалынньыга Иннокентий Семенов, нэһилиэк баһылыга Екатерина Гаврильева, тыа хаһаайыстыбатын исписэлииһэ Людмила Жиркова буолан сылдьарбытыгар, хотонугар 54 сүөһү турарын эппитэ. Далга атыыга барыахтаах 20 сүөһү хоочугураһа сылдьаллара. Хаһаайын этэринэн, үксүлэрэ тиҥэһэ саастарыгар чугаһаабыт сүөһүлэр, оттон иһирдьэ турааччылартан отуччата тыһаҕастар, уоннааҕылара торбостор эбит.
Саҥа хотон икки эргиир тиит мас акылаакка турар, тас өттө тимир бүрүөһүн, иһэ мас, ол икки ардынан сылааһы тутар араҥалаах. Икки эркинин тилэри поликарбонат түннүктээбит буолан, хотон иһэ сып-сырдык. Лоп-бааччы оҥоһулаах тутуу буолбут. Сүөһүлэри иһирдьэ турар баахтан носуоһунан хоруудаларга уу бырахтаран уулаталлар, күҥҥэ иккитэ аһаталлар.
‒ Үс үлэһиттээхпин: Владислав Иванов, Виктор Чон-Хон-Сун уонна Роман Петров. Хаптаҕай олохтоохторо. Сайын бары кыттыһан оттуубут. Икки тыраахтардаахпыт. Бэйэм сирим суох, наар түүлэһэргэ күһэллэбин. Хас да сиринэн, үксүн арыыга оттообуппут. Эбии аһылыкка Хаптаҕайдааҕы комбикорм собуотуттан хараллар болдьоҕо ааспыт эбии аһылыгы, сүүрбэччэ куулу 200-түү солкуобайга атыыластым, ‒ диэн кэпсиир Дмитрий Жирков.
Үлэтин саҕалыырыгар, сүөһүлэрин үксүн ыаллартан, М.Егоров аатынан хаһаайыстыбаттан 30 торбоһу атыыласпыт. Ол гынан баран, Егоровтан ылбыт ньирэйдэрэ төлөһүйбэккэлэр, иккистээн кыстатарга күһэллибит, инньэ гынан, быйыл эбии сүөһү атыыласпат буолбут. Былырыын этин батарарыгар уустуктары көрсүбүт. Этин аҥаарын «Майатааҕы үүт кэмбинээтэ» хааччахтаммыт эппиэтинэстээх уопсастыбаҕа киилэтин 450-нуу солкуобайга туттарбыт. Быйыл атыылаһыан баҕалаахтар син көстүтэлээн эрэллэр эбит.
Нэһилиэк дьаһалтата Дмитрий Дмитриевичкэ бөһүөлэктэн чугас, 5 кэриҥэ гаалаах, уруккута хортуоппуй бааһынатын биэрэр былааннаах. Дмитрий Жирков дьиэ кэргэн балаһыанньатын туоһуласпыкка, кэргэнэ Екатерина Афанасьевна «Майатааҕы үүт кэмбинээтэ» ХЭУо-ҕа каадыр отделыгар үлэлиирин, кыыстара Уус Майа улууһугар үлэлии сылдьарын кэпсээтэ.
Аркадий Иннокентьев, «Саха сирэ» хаһыат, edersaas.ru