Бэҕэһээ Үөһээ Бүлүү нэһилиэгин Төҥүргэстээх диэн алаадьы курдук төгүрүк күөллээх сиригэр саҥа ипподрому “айааһаатылар”. Ат спордун сэҥээрээччилэргэ чахчы дьоро киэһэ үүннэ.
Арыйыы сиэригэр-туомугар СӨ бырабыыталыстыбатын бэрэссэдээтэлин солбуйааччы, Манчаары оонньууларын тэрийэн ыытар кэмитиэт салайааччыта Михаил Гуляев, Саха сиринээҕи ат спордун федерациятын бэрэссэдээтэлэ, Дьокуускай куорат дьаһалтатын баһылыга Айсен Николаев уонна Үөһээ Бүлүү улууһун баһылыга Владимир Поскачин кытыннылар.
Владимир Семенович Төҥүргэстээххэ ат сүүрдүүтэ аан маҥнай 2008 сыллаахха тэриллибитин, 1200 миэтэрэ эргимтэлээх сүүрэр суол ирдэбилгэ сөп түбэһэрдии ойууру солоон, 1600 миэтэрэҕэ диэри кэҥэтиллибитин, 27 тыһ. куб. м буор, 16 тыһ. куб. м кумах кутуллубутун, 1 тыһ. киһи олорор стадиона тутуллубутун, быһата, сөҕүмэрдээх үлэ ыытыллыбытын быһааран кэпсээтэ. Иннокентий Семенов салайааччылаах “Тоҥуо” ХЭУо улахан кээмэйдээх үлэни толорбута улуус баһылыгын Махтал суругунан бэлиэтэннэ.
Барыта аҕыс сүүрүү үп-харчы бириистээх ыытылынна. “СахаАгроПродукт” потребкэпэрэтиип бырабылыанньатын бэрэссэдээтэлэ Константин Тимофеев бастаабыт аттаахтарга 15-тии, иккистэргэ 10-нуу, үһүстэргэ 5-тии тыһ. солкуобайы тута туттартаан истэ. Биир дистанцияҕа Айсен Николаев бэйэтин сиэбиттэн ылан, 20 тыһ. солкуобайы биэрдэ. Ороһу аатырбыт ат баайааччыта Василий Борисов оҕолоро, бииргэ төрөөбүттэрэ 80 тыһ. солкуобайы 1 тыһ. миэтэрэҕэ сүүрдүүгэ туруорбуттарын предприниматель Николай Эттээнэп былырыын соҕурууттан атыылаһан аҕалбыт Кул-Жет диэн ыраас хааннаах быһый ата бастаан ылла.
Аҕыс түһүмэхтэн биэһигэр олохтоохтор баһыйа туттулар. Бүлүүлэр, чурапчылар биирдии сүүрүүгэ бастаатылар. Дьэ, ити гынан баран, саамай улахан бириистээх, хатыһыылаах киирсии тиһэх түһүмэххэ – 2400 миэтэрэҕэ сүүрдүүгэ буолла. Уус Алдан Сыырдааҕын быһый атахтааҕа Дубая олохтоохтор эрэллэрин Архангелы аҕыйах миэтэрэнэн кэннигэр хаалларан, хаһаайыттарыгар Үөһээ Бүлүү улууһун дьаһалтата туруорбут УАЗ-Хантер массыынатын тэбэн биэрдэ.
Үөһээ Бүлүү саҥа ипподромугар улуус баһылыгын бастакы солбуйааччы Андрей Неустроев көҕүлээһининэн Манчаары дербитэ аан маҥнай тэриллэн сүрэхтэннэ уонна ыалдьыттар тустарыгар түмүктэннэ. “Оонньуу аата оонньуу: ыраахтан кытта кэлбит дьон үөрэрэ-көтөрө туох куһаҕаннаах буолуой”, — диэн бу боппуруоска бөлүһүөктүү сыһыаннаһарын биллэрдэ. Бүгүн киэһэ өссө ыһыылаах-хаһыылаах сүүрдүүлэри көрүөхпүт. Сыаналаах бириистэр, харчылаах кэмбиэрдэр өссө даҕаны бүтэ иликтэр итиэннэ ыраас хааннаах боруода аттар хамаандаларыгар (барыта 10 хамаанда кыттар) “харах” тэбэн биэриэхтэрэ. Санатан эттэххэ, ат спордун федерациятын туруорсуутунан ат сүүрдүүтэ Манчаары оонньууларын бырагырааматыгар аан маҥнай 2009 сыллаахха киллэриллэн турар.
Василий НИКИФОРОВ, «Саха сирэ» хаһыат, edersaas.ru
Ааптар хаартыскаҕа түһэриитигэр: уус алданнарга УАЗ-Хантер массыынаны тэбэн биэрбит Дубая.