«Хантер» булчут паб-эрэстэрээнэ — бэстибээл быйылгы арыйыыта

Бу күннэргэ Дьокуускай куорат дьаһалтатын уокуруга тэрийэр  «Кыһын Саха сириттэн саҕаланар» кыһыҥҥы туризм бэстибээлин чэрчитинэн төрдүс сылын ыытыллар «Саха сирин амтана» («Вкус Якутии») гастрономия бэстибээлэ олус тэрээһиннээхтик үрдүк таһымҥа ыытылынна.

edersaas.ru

2016 сыллаахха гастрономия бэстибээлэ «Russian Event Awards» событийнай туризм эйгэтигэр «Гастрономия туризмын салаатыгар бастыҥ туристическай событие» диэн номинацияҕа Национальнай бириэмийэни ылбыта. Ол да иһин буолуо, тэрээһиҥҥэ сыл аайы саҥаттан саҥа ааттаах-суоллаах экспердэр уонна ыалдьыттар кэлиилэрэ элбээн иһэр. Биллэн турар, гастрономия бэстибээлэ Дьокуускай куоракка ахсааннара күнтэн күн элбии турар эрэстэрээннэр бэйэлэрин ыалдьыттарын хааччыйар таһымнарын үрдэтиилэригэр олус улахан оруоллаах.

Быйыл эрэстэрээннэри  көрүү ирдэбилэ уларыйан, куонкуруска кыттааччыларга үлэлэригэр сонун көрүүнү киллэрдэ. Ол ону хас да сылы быһа гастрономия бэстибээлин сырдатар суруналыыстар тута бэлиэтии көрдүбүт.

Бастатан туран, СӨ Ыалдьытымсах буолуу ассоциациятын бэрэссэдээтэлэ, ресторатор Татьяна Тымырова салайааччылаах тэрийэр кэмитиэт «Вкус Якутии» диэн үс күнү быһа ыытыллар гастрономия бэстибээлигэр кыттар 11 эрэстэрээн туһунан билиһиннэрэр бэртээхэй буклет-альбому таһаарбытын бэлиэтиир наадалаах.

Суруналыыстары быйыл анал испииһэгинэн сырыттыннарбыт буолан, миэхэ «Хантер» булчуттар паб-эрэстэрээннэрэ түбэстэ.

Бу тэрилтэ былырыын алтынньы ыйга аһыллыбыт. Биир сыл иһигэр эрэстэрээн 100 араас интэриэһинэй ис хоһоонноох тэрээһиннэри ыыппыт. Манна биллиилээх саха эстрадатын артыыстарын тэҥэ саҥа айар үлэҕэ үктэммит ыччаттар бэйэлэрин кэнсиэртэрин ыыталлар эбит.

— «Хантер» эрэстэрээн булчуттар кулууптарын уонна түмсүүлэрин кытта ыкса сибээстээхтик үлэлиир буолан, булт түөрт кэминээҕи сезонугар анаммыт араас тэрээһиннэри тэрийэбит,— диэн кэпсиир «Хантер» эрэстэрээн  управляющайа Ирина Ефремова. Ол да иһин буолуо, манна  хас биирдии истиэнэҕэ булчут тыына баарга дылы.

Араас ис хоһоонноох булчуттар хаартыскалара, булт тэрилэ эрэстэрээн интерьерын олус киэргэтэллэр.

Бу саала — эрэстэрээн иккис этээһин биир дьоҕус хоһо. «Саха сирин амтана» куонкурус тэрээһинэ, биллэн турар, манна буолла. Тэрээһин ирдэбилинэн «классическай» уонна «этническэй» хайысхаларга күөн күрэс ыытыллар. Онон «Хантер» паб-эрэстэрээн бу хайысхаҕа миэстэлэһэр кыахтаныыһы.  Ол ону бигэргэтэн, эрэстэрээн салалтата виртуоз-хомусчукка  Георгий Слепцовка-Чаҕылхаҥҥа олус бэркэ таба тайаммыт.

Айар куттаах эдэр киһи бэйэтин чаҕылхай талаанынан ааттаах-суоллаах экспердэри сөхтөрдө. Онон эрэстэрээн «Национальнай үгэстэри тутуһуу» номинацияҕа бэйэтигэр тустаах сыанабылы эбиннэ диэххэ сөп.

— Булчуттар эрэстэрээннэрэ диэх курдук, бары өттүнэн бу хайысха ирдэбилигэр сөп түбэһэр тэрилтэ эбит. Саха сирэ сибиэһэй булт аһынан аатырыан аатырар. Мин бэйэм Сибиир олохтооҕо буолан, сибиэһэй эти, балыгы олус күндүргэтэбин. Бааһынай ырыынагар сылдьан баран сибиэһэй эт, үүт, балык ас элбэҕиттэн сөхтүм. Онон «Хантер» эрэстэрээн, төһө да былырыын төрүттэннэр, ааттаах-суоллаах эрэстэрээннэри кытта биир кэккэҕэ туран,»Саха сирэ амтана»  диэн гастрономия күөн-күрэһигэр кыттыбытын киһи хайҕыан эрэ сөп.  Эрэстэрээн салалтата бу курдук тэтимнээхтик үлэлээн, бары тэрээһиннэргэ көхтөөхтүк кыттарыгар баҕарабын.  Ааттаах-суоллаах куонкурустарга кыттарга бастакы олук уурулунна, — диэн бэлиэтээтэ  «Кыһын Саха сириттэн саҕаланар» кыһыҥҥы туризм бэстибээлин бочуоттаах ыалдьыта, Новосибирскай куорат уонна Новосибирскай уобалас Ресторатордарын уонна отельердарын федерациятын бэрэсидьиэнэ, Кулинарнай сойуустар аан дойдутааҕы ассоциациятын бэрэсидьиэнэ, ресторатор Владимир Бурковскай.

Эрэстэрээн булт ас арааһыттан,  астаан көрдөрдө. Ол курдук, экспердэргэ көрдөрбүт сетыгар (меню), тылбаастаабакка билиһиннэрдэххэ, «Гнездо глухаря» салаат,»Десерт охотника» диэн амтаннаах ас уонна утах, көҕөнтөн оҕуруот аһа эбиилээх бэрт интэриэһинэй уонна сонун салааттары амсайдыбыт. Ол быыһыгар булчуттар солбуллубат «аргыстара» —  кинилэр тапталлаах «сгущенкаларын» кытта алаадьы баара эмиэ олус сонуннук көһүннэ.

Таба этин фаршыгар тэллэйи эппит бэрэскилэрэ эмиэ минньигэһэ сүрдээх!

Онон «Хантер» булчуттар паб-эрэстэрээннэрэ ас бэстибээлин саҥа арыйыытынан буолара саарбахтаммат!

Дьокуускай куорат эрэстэрээннэрэ «Саха сирин амтана» гастрономия бэстибээлигэр кыттыбыт түмүктэрин сарсын, ахсынньы 3 күнүгэр, «Триумф» спортивнай комплекса ыытыллар «Кыһын Саха сириттэн саҕаланар» дьоро күҥҥэ билиэхпит. 

Елена ПОТОЦКАЯ, «Саха сирэ», edersaas.ru

Ааптар хаартыскаҕа түһэриитэ.