Айылҕа харыстабыла Уопсастыба

Ханнык улуустарга шелкопряды эмтиэхтэрэй?

Саха сирин түөрт улууһун сиригэр-уотугар Сибиир шелкопрядын утары охсуһуохтара.

Саха сирин Экологияҕа, айылҕа баайын туһаныыга уонна ойуур хаһаайыстыбатыгар министиэристибэтэ иһитиннэрбитинэн, Амма, Мэҥэ Хаҥалас, Горнай уонна Нам улуустарыгар уопсайа 59 221,0 га иэннээх сири салгынынан  химиичэскэй ньыманан ыраастыахтара. Буортулааччы көрдүгэнин суох оҥорорго «Клонрин КЭ» инсектициды туһаныахтара.

Бу препарат куттал суох буолуутугар 3 кылаастаах, дьоҥҥо, ынахха-сүөһүгэ, кыылга-сүөлгэ куттала суох.

Атырдьах ыйын 10 күнүттэн балаҕан ыйын 5 күнүгэр диэри химиичэскэй ыраастааһын кэмигэр ойуурга сылдьыы уонна үөһээ ыйыллыбыт улуустар сирдэригэр-уоттарыгар отонннооһун, тэллэйдээһин бобуллар.

Эбэн эттэххэ, маннык химиичэскэй ыраастааһын, ханнык улууска шелкопряд киэҥник тарҕаммытыттан көрөн, сыл аайы ыытыллан кэллэ.

Сибиир шелкопряда Уралтан  Уһук Илиҥҥэ диэри мутукчалаах ойуурга үөскүүр. Киэҥник тарҕанар  кэмигэр түүлээх үөн ыамата ойууру кэрбээн сиэн, ойуур хаһаайыстыбатыгар буортуну эрэ аҕалар.

Надежда ЕГОРОВА, «Саха сирэ», edersaas.ru

0
0
Telegram Whatsapp