“Ханнык идэ олоххо ирдэнэрин кэм бэйэтэ көрдөрдө”

Ааптар: 
Бөлөххө киир:

Коронавируһунан сибээстээн, аан дойду, ол иһигэр Арассыыйа, Саха сирин олохтоохторо үгүстэрэ ыраахтан олорон үлэлииллэр. Арай, мэдиссиинэ эйгэтигэр үлэлиир дьон эрэ ыарыыны кытта күннэтэ уун-утары көрсөллөр, охсуһаллар. Инники күөҥҥэ сылдьар мэдиссиинэ үлэһиттэрин өйөөн, РФ бэрэсидьиэнэ Владимир Путин эбии төлөбүр туһунан дьаһалга илии баттаабыта.

edersaas.ru

Ил Түмэн (Судаарыстыбаннай Мунньах) Дьиэ кэргэҥҥэ уонна оҕо аймахха кэмитиэтин бэрэссэдээтэлэ, Доруобуйа харыстабылыгар, социальнай көмүскэлгэ, үлэҕэ уонна үлэлээх буолууга кэмитиэтин чилиэнэ Алена Атласова санаатын үллэһиннэ:

Күн бүгүн мэдиссиинэ үлэһиттэрэ дьон доруобуйатын, олоҕун туһугар бары билиилэрин, сатабылларын, кыахтарын барытын уураллар. Коронавируһу бохсууга үлэлиир быраастар эрэ буолбакка, сиэстэрэлэр, санитардар ыарыыны кытта күннэтэ алтыһаллар, бэйэлэрин доруобуйаларын харыстаабакка үлэлииллэр. Онон дойду бэрэсидьиэнэ Владимир Путин уонна СӨ Ил Дархана Айсен Николаев медиктэргэ эбии төлөбүр көрүллүүтүгэр дьаһалы таһаарбыттара сөптөөх.

Биллэн турар, медиктэри билиҥҥи курдук ыарыы ыган турар кэмигэр өйүөхтээхпит. “Биир ньыгыл Арассыыйа” баартыйа “Бырааска махтал” диэн аахсыйанан бородуукта наборун бэлэмнээн туттарар.

Ону тэҥэ, аҕыйах хонуктааҕыта Ил Түмэн дьокутаата, быраас Любовь Явловская көҕүлээн, Суударыстыбаннай Дуумаҕа этии киллэрбитин дьокутааттар өйөөбүппүт. Ол курдук, кини  эрдэ ылыныллыбыт “РФ гражданнарын доруобуйатын харыстыыр төрүттэр тустарынан” федеральнай сокуоҥҥа олохторугар, доруобуйаларыгар кутталлаах үлэни кытта сибээстээх мэдиссиинэ, фармацевтика уонна дорубуйа харыстабылын атын даҕаны тэрилтэлэрин үлэһиттэригэр булгуччулаах страховка туһунан ыстатыйаны киллэриэххэ эбэтэр атын сокуонна ылыахха диэн этэр.

Арассыыйаҕа коронавирустан сылтаан быраастар тыыннара быстыбытын туһунан истэбит. Соторутааҕыта Санкт-Петербурга баран үлэлии сылдьыбыт биир дойдулаахпыт суох буолбута. Онон кэллиэгэбит этиитин норуот дьокутааттара өйөөтүбүт.

Тус бэйэм быраастары кытта алтыспытым быданнаата. Балачча уһун кэм устата “Праздник жизни” искэн ыарыылаах оҕолоох дьиэ кэргэҥҥэ анаммыт аһымал пуонданы тэрийэн үлэлээбитим. Оҕо, улахан дьон ыалдьар түгэнигэр бастакы көмөнү оҥорор, эмтиир дьон — быраастар. Холобура, Японияҕа быраастары “учуутал” диэн ааттыыллар. Сайдыылаах дойдуга курдук биһиэхэ эмиэ быраастар статустара өрө тахсарыгар баҕарабыт.

Ылбычча киһи быраас буолбат. Үгүс сылын үөрэххэ анаан, ординатураны, быраактыканы ааһан, олоҕун тухары үөрэнэн эрэ баран быраас идэтин баһылыыр. Онон исписэлиистэрбитин харахпыт харатын курдук харыстаан, үлэлиир усулуобуйа тэрийэн өйүөх тустаахпыт.

Уопсайынан, судаарыстыба өттүттэн бу идэҕэ  болҕомто ууруллуохтаах. Күн бүгүн коронавирус ыарыыттан эмтээччилэри сэргэ, холобура, Мэдиссиинэ национальнай киинигэр кардио уонна нейрохирургическай эппэрээссийэлэри оҥорбуттарын курдук оҥороллор, дьахталлары төрөппүттэрин курдук төрөтөллөр, искэн, хроническай ыарыылаахтары, суһал ыарыһахтары эмтээбиттэрин курдук эмтииллэр. Эмтиир тэрилтэлэргэ харантыын иһигэр харантыыны тутуһан, кытаанах эрэсиимнээх үлэлииллэр. Ыарыһахтарга коронавируһу сыһыарбат туһугар олус улахан эппиэтинэһи сүгэллэр. Онон уопсастыба көмөтүттэн саҕалаан, судаарыстыбаннай көмөҕө тиийэ миэрэлэр ылыллыахтаахтар, эминэн-томунан, мэдиссиинэ оборудованиетынан, туһаныллар матырыйаалынан ыарыһахтары эмтииргэ кэмигэр хааччылла туруохтаахтар. Оччоҕо эрэ мэдиссиинэ сайдар кэскиллээх

Билиҥҥи туругунан көрдөххө, дьон олоҕун туһугар ханнык идэлэр ирдэнэллэрин, быһаарар оруоллаахтарын кэм бэйэтэ көрдөрдө, — диэн медиктэри кытта үгүстүк алтыспыт дьон быһыытынан санаатын үллэһиннэ.

Людмила ПОПОВА, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0