Бүгүн, кулун тутар 21 күнүгэр, «Сахамедиа» медиакиинигэр куорат баһылыгын хандьыдааттарын дебатын иккис эргимтэтин иккис бөлөҕө күөн көрүстэ.
Бүгүҥҥү түмүктүүр дебакка хандьыдааттар Иван Комаров, Илья Паймушкин, Микаэл Заболотнай уонна Евгений Григорьев кытыннылар. Бастакы түһүмэххэ хас биирдии хандьыдаакка үстүү мүнүүтэ бэрилиннэ.
Манна Иван Комаров куорат кытыы оройуоннарын сайыннарыыга болҕомто ууруохха наадатын бэлиэтээтэ. Илья Паймушкин СМИгэ, рекламаҕа харчыны бараабакка, куоракка оскуола, оҕо уһуйаанын элбэтиигэ болҕомто уурар наадатын ыйда. Оттон Микаэл Заболотнай кылааска куоракка 40 оҕо үөрэнэрэ уустугун, куорат туһугар үлэ ыытыллыахтааҕар тоһоҕолоон санаатын тиэрэ. Евгений Григорьев хаарбах дьиэттэн дьону көһөрүү ахсаанын өссө элбэтиини, дьиэ тутуутун бырыһыанын үрдэтиини эттэ.
Иккис түһүмэххэ хандьыдааттар баһылык буоллахтарына хайдах быһыылаахтык үлэлиэхтээхтэрин кэпсээтилэр. Итиэннэ быһа эпииргэ холбоспут суруналыыстар биэрбит ыйытыыларыгар чопчу эппиэти биэрдилэр. Суруналыыстар сүрүннээн 17-с кыбаартал кыһалҕатын, Уһук Илин ипотека кэлиэҕиттэн дьиэ сыаната үрдээбитин туһунан дьону долгутар ыйытыылары биэрдилэр. Маны сэргэ, бу хандьыдааттар куорат кыһалҕаларын хайдах быһыылаахтык быһаарыахха сөбүн туһунан бэйэ бэйэлэригэр ыйытыылары бэристилэр. Түһүмэххэ кэпсэтии оптуобус маршрутун уларытыы, олорор усулуобуйаны тупсарыы туһунан буолла.
Үһүс түһүмэххэ хандьыдааттар бэйэ-бэйэлэригэр тургутар ыйытыылары биэрдилэр. Куорат олохтоохторун долгутар сүрүн боппуруостары туруордулар. Илья Паймушкин уонна Микаэл Заболотнай куорат тоҕо кирдээҕин туһунан кэпсэттилэр. Паймушкин этэринэн, кумах быылы өрүкүтэр, оттон Заболотнай санаатыгар массыыналар куораты киртитэллэр. Эколог идэлээх Заболотнай күөлгэ, өрүскэ массыынаны сууйууну утарарын, массыыналары босхо сууйар сирдэр баар буолуохтаахтарын бэлиэтээтэ.
Салгыы мээргэ турар хандьыдааттарга куораты төһө билэллэрин тургуттулар. Куорат кэтэх уулуссаларын, дьон хараҕар быраҕыллыбат сирдэри экрааҥҥа көрдөрөн, тургутуу сэргэхтик ааста. Манна Евгений Григорьев уонна Иван Комаров куорат уулуссаларын эндэппэккэ билэллэрин көрдөрдүлэр.
Ульяна Захарова, «Саха сирэ» хаһыат, edersaas.ru