Сахалар маспытыттан өтөрүнэн арахсыа суохпут быһыылаах. Дьокуускайга былырыын атырдьах ыйыгар буруус маһы пастаан, профиллаан таһаарар дьоҕус тэрилтэ үлэтин саҕалаабыта.
edersaas.ru
“Теплый брус” ХЭУо дириэктэрэ Валерий Филиппов: “Дьон буруус дьиэ хайаан даҕаны эпсиэйдэниэхтээх диэн өйдөбүллээхтэр. Биһиги технологиябытынан бурууһу устуруустаан, профиллаан баран, лего-конструктор курдук сааһылаан таһаараҕын уонна хараарбатын туһугар 3-5 сыл буола-буола таһыттан кыраасканан сотоҕун. Онон бүтэр”, — диир.
Профилированнай буруус ханаппаакыламмат. Арай, буруустар сыстыһар сирдэригэр аныгы лиэнтэ пакля ууран бэриллэр. Сылааһы таһаарбат, тымныыны, тыалы, ардаҕы курдат киллэрбэт. Валерий Валерьевичтаах ааспыт күһүн тутан киллэрбит дьиэлэрин быйыл кыһын 50 кыраадыс тымныыга тургутан көрбүттэрэ – 23 кыраадыс итии үһү. Профилированнай оҥотторорго көннөрү буруустан 1 куб. миэтэрэтигэр 2 тыһ. солк. харчынан ыарахан буолар, ол эбэтэр 6 м х 6 м дьиэ матырыйаалыгар 30 тыһ. солкуобайы эбэҕин. Оттон кэччэннэххинэ, кэлин эпсиэйдииргэр аҥаардас матырыйаалыгар уонна үлэтигэр 100 тыһыынчаны ордук төлүүргэр тиийиэҥ.
Урбаанньыт В.Филиппов маҥнай үлэтин саҕалыырыгар олоччу электроэнергияны туттар буолан, салла санаабыта – дойду бырабыыталыстыбатын дьаһалынан тарыып 9 солкуобайтан 3 солк. 84 харчыга диэри түһэриллэн, баһаам көмөлөспүтүн билинэр. “Онон урукку сыанабытын тутан турабыт”, — диир.
Василий НИКИФОРОВ, edersaas.ru