Сааскы халаан уутун сүтүгэ суох аһардар туһугар эрдэттэн бэлэмнэнэр дьаһаллар тэриллэллэр.
— Уу ылар кутталлаах сирдэриттэн сүөһүнү-сылгыны таһааран быстах хаайар пууннар туруктарын эрдэттэн бэрэбиэркэлээн, өрөмүөннэппиппит, наада буолар оту-бурдугу хааччыйтарбыппыт. Бу күннэргэ хаһаайыстыбалар өрүс арыыларыгар уонна хочолоругар кыстаппыт, сааһаппыт сылгыларын үөһэ, уу ылбат сирдэригэр таһаардылар, — диир Хаҥалас улууһун баһылыга Федор Борисов.
Бу улууска өрүс сүнньүгэр тоҕус нэһилиэнньэлэх пуун турар, онтон иккитэ арыыларга баар. Инньэ гынан, халаантан сэрэхтээх буолуу үлэтин тэрээһинэ манна улахан болҕомтоҕо ууруллар. Тыа хаһаайыстыбатын улуустааҕы департамена иһитиннэрэринэн, уу ааһар кэмигэр быстах хаайар пууннарга 2653 ынах сүөһү уонна 3263 сылгы таһаарыллыахтаах. Халааны утары улуустааҕы суһал ыстаап уонна нэһилиэктэр дьаһалталарын тыа хаһаайыстыбатыгар исписэлиистэрин тэрээһиннэринэн, хас биирдии ыалынан төһө сүөһү-сылгы баара өсө төгүл ааҕыллыбыт, ууга барар кутталлаах эбийиэктэр испииһэктэрэ, сүөһүнү-сылгыны үөһэ таһаарыы былаана оҥоһуллубут. Сүөһүнү-сылгыны быстах хаайар пууннарга таһаарар эрчиллиилэр ыытыллыбыттар.
Раиса Сибирякова, «Саха сирэ» хаһыат, edersaas.ru