Хаҥалас оскуолаларын 1985 сыллаахха бүтэрбиттэр «Үтүө дьыала» куубагын тутан, аахсыйаҕа кыттыстылар. Бу аахсыйаны Саха АССР оскуолаларын 1985 сыллаахха бүтэрбиттэр түмсүүлэрэ тэрийэр.
Куубак номнуо 35 оройуоҥҥа сырытта. Эстафетаны туппут оройуон уон күн иһигэр үтүө дьыалалары оҥоруохтаах — субуотунньуктууллар, аһымал аахсыйаларын ыыталлар, дьоҥҥо көмөлөһөллөр, кэнсиэрдииллэр, быыстапкалыыллар уо.д.а.
Бэҕэһээ, от ыйын 8 күнүгэр, Дьиэ кэргэн, таптал уонна эрэллээх буолуу күнүгэр «Орто дойду» сиригэр-уотугар Чурапчы оскуолаларын 1985 сыллаахха бүтэрбиттэр хаҥаластарга куубагы үөрүүлээх быһыыга-майгыга туттардылар.
Тэрээһиҥҥэ улуус баһылыгын солбуйааччы Олег Иринеев кытынна уонна: «Хаҥалас оскуолаларын 1985 сыллаахха бүтэрбиттэр олус түмсүүлээхтэр, чаҕылхайдар. Ааспыт сыл муус устарыттан саҕалаан кэккэ тэрээһиннэри ыыттылар. Атын «выпустар» бу көҕүлээһини салгыахтара диэн эрэнэбит», — диэн эттэ.
Хаҥаластар түмсүүлэрин салайааччы Альбина Козлова иһитиннэрбитинэн, ааспыт сылтан саҕалаан оройуону барытын хабан үтүө дьыалалары тэрийбиттэр эбит. Ол курдук, социальнай кииҥҥэ сымнаҕас миэбэл бэлэхтээбиттэр, 28-с №-дээх интэринээт-оскуола үөрэнээччилэригэр кэнсиэрдэргэ билиэттэри түҥэппиттэр, элбэх оҕолоох ыалларга оонньуурунан, наадалаах бэлэхтэринэн көмөлөспүттэр, араас күрэхтэһиилэри ыыппыттар, субуотунньуктаабыттар.
Хаҥаласка «Үтүө дьыала» аахсыйа от ыйын 8-18 күннэригэр ыытыллыаҕа. Онтон салгыы куубак Жатай уонна Дьокуускай оскуолаларын 1985 сыллаахха бүтэрбиттэргэ тиийиэҕэ диэн Хаҥалас дьаһалтатаын пресс-сулууспата иһитиннэрэр.
edersaas.ru