Хаҥалас улууһун Өктөмүгэр СӨ Наукатын аччыгый академиятын үөрэнэр, араас чинчийиини ыытар куорпуһун тутуута саҕаланна. Бүгүн бастакы сыбаайаны түһэрэр үөрүүлээх быһыыга-майгыга Ил Дархан Егор Борисов сырытта.
Санатан эттэххэ, Наука аччыгый академията 2015 сыллаахха тэриллибитэ. Төһө да быйыл үһүс сылларын үлэлии олодоллор, академия өрөспүүбүлүкэни бүттүүнүн хабан, талааннаах оҕолору таһаартаан эрэр.
Үс этээстээх саҥа куорпус 150 оҕону үөрэтэр миэстэлээх, 100 оҕону олордор интернаттаах буолуоҕа. Бу тутуу талааннаах оҕолору өйүүр туһунан Ил Дархан ыйааҕын чэрчитинэн тутуллар, Саха сирин 2030 сылга диэри сайдыытын стратегиятыгар киирэ сылдьар. Тутууну “Адгезия” хампаанньа иилээн-саҕалаан ыытыаҕа, эһиил олоххо киллэрэр санаалаахтар.
Егор Афанасьевич киирии тылыгар бу эбийиэк ураты суолталааҕын бэлиэтээн туран: “Биһиги өрөспүүбүлүкэбитигэр талааннаах оҕолорбут элбэхтэр. Кинилэр араас күрэхтэһиигэ, олимпиадаҕа кыттан дойдуларын чиэһин көмүскүүллэр, аар-саарга аатырдаллар. Кинилэр – биһиги кэскилбит. Өрөспүүбүлүкэбитигэр кэнэҕискитин цифровой экономиканы киллэриэхпитин, экономика бары хайысхатыгар көҥү анньан инники күөҥҥэ тахсыахпытын баҕарар буоллахпытына, бастатан туран, каадыр боппуруоһун быһаарыахпытын наада”, — диэн бэлиэтиир.
Тутуу “Роснефть”, “Таас-Юрях Нефтегазодобыча” хампаанньалар үбүлээһиннэринэн ыытыллар. Бу туһунан былырыын Владивостокка буолбут Илиҥҥи экономическай форум кэмигэр Ил Дархан “Роснефть” хампаанньа салайааччытын Игорь Сечины кытары кэпсэппитэ, эбии дуогабар түһэрсибитэ. Ол чэрчитинэн, хампаанньа өрөспүүбүлүкэ социальнай-экономическай сайдыытыгар быһаччы кыттыһыахтааҕа.
Тэрээһиҥҥэ бу туһунан тээн туран, Таас-Юрях Нефтегазодобыча” ХЭТ генеральнай дириэктэрэ Николай Сюткин: “Бу маннык хардарыта үлэлэһии региоҥҥа да, хампаанньаҕа да ураты суолталаах. “Роснефть” каадыры бэлэмнээһиҥҥэ улахан болҕомтотун уурар. Өрөспүүбүлүкэҕэ “Оскуола – үрдүк үөрэх – хампаанньа” диэн корпоративнай бырагыраама үлэлээбитэ хаһыс да сыла. Онон, мин санаабар, Наука аччыгый академиятын кэҥээһинэ кэнэҕэскитин өрөспүүбүлүкэҕэ каадыры бэлэмнээһиҥҥэ улахан олук буолуоҕа”, — диэн иһитиннэрдэ.
Аграфена КУЗЬМИНА, «Саха сирэ» хаһыат.