Хамыыһыйалар чилиэннэрэ анаалыс туттарбыттар дуо?

Бөлөххө киир:

От ыйын 2 күнүгэр Саха сирин киин быыбардыыр хамыыһыйата барыллаан түмүктэр тустарынан пресс-кэмпириэнсийэни ыытта.

edersaas.ru

Өрөспүүбүлүкэ үрдүнэн 820 быыбардыыр учаастак үлэлээбит. Олортон 791 — бастайааннай, 29 – быстах кэмҥэ үлэлээбит учаастактар. Быстах кэмнээх учаастактар балыыһаларга, обсерватордарга, кырдьаҕастар дьиэлэригэр, о.д.а. үлэлээбиттэр.

2018 сылтан “мобильнай быыбардааччы” диэн өйдөбүл киирбитэ. Онон 18 218 киһи интэриниэтинэн куоластаабыт. “Эрдэттэн куоластааһыҥҥа” 27 улууска 13 210 киһи хабыллыбыт. Бу суола-ииһэ суох, ыраах сытар сирдэргэ быыбардыыр хамыыһыйалар чилиэннэрэ тиийэн, куоластаппыттар. Ол курдук, 121 сиргэ сөмөлүөтүнэн, 339 сиргэ уунан, сиринэн айаннаан тиийбиттэр.

Коронавируснай инфекция тарҕаммыт сиригэр эрэ, быыбардыыр хамыыһыйалар чилиэннэрин үс гыммыт биирэ эрдэ, куоластааһын саҕаланыан иннинэ, анаалыс туттарбыттар. Барыта 2,5 тыһыынча анаалыс туттарыллыбытыттан, 9 киһи коронавируһунан ыалдьаллара биллэн, балыыһаҕа киирбиттэр.

Учаастактарга 3,5 тыһыынча кэтээн көрөөччү үлэлээбит. Роспотребнадзор быраабылатын быһыытынан, кинилэр анаалыһы туттарбатахтар. Кэтээн көрөөччүлэртэн биир да үҥсүү, быраабыланы кэһии туһунан иһитиннэрии киирбэтэх.

Саха сиринээҕи Киин быыбардыыр хамыыһыйа бэрэссэдээтэлэ Алексей Ефимов уустук усулуобуйаҕа — өҥүрүк куйааска харыстанар көстүүмнэри кэтэн олорон, сэттэ күнү быһа быыбардыыр учаастактарга үлэлээбит дьоҥҥо махтанарын биллэрдэ. Бу үлэһиттэр куоластааһын кэннэ иккистээн анаалыс туттаралларын туруорсуохпут диэн бэрэссэдээтэли солбуйааччы Ирина Конакова бэлиэтээтэ.

Ангелина Васильева, “Саха сирэ” хаһыат, edersaas.ru

Хаартыска: СИА

+1
0
+1
0
+1
0
+1
0
+1
0
+1
0
+1
0