Ааспыт суукка5а 51 киһи ыалдьыбытын туһунан иһитиннэриинэн брифини саҕалаата СӨ бырабыыталыстыбатын бэрэссэдээтэлин солбуйааччы, суһал штаб салайааччытын солбуйааччы Ольга Балабкина.
edersaas.ru
Кини этэринэн, итинтэн Дьокуускайга 42 киһи бу ыарахан дьаҥҥа хаптарбыт. Онон киин куораппытыгар 7 киһинэн ыалдьыбыт киһи ахсаана эбиллибит. Сүрүннээн дьиэ кэргэн иһигэр дьаҥҥа хаптарыы тахсыбыт. Онон ыарыы сибикитэ билиннэ да, “Суһал көмөнү” ыҥырарга, дьиэ кэргэн атын чилиэнин сутуйбат туһугар дьаһанарга эттэ. Маны сэргэ иккилии киһи – Мииринэйгэ уонна Өлүөхүмэҕэ. Ольга Валерьевна Өлүөхүмэ улууһугар анаан-минээн тохтоото. Бу улуус оҕо сынньанарыгар олус табыгастаах усулуобуйалаах дойду буоларын аҕынна. Манна II Нөөрүктээйи нэһилиэгэр дьаҥы сайылыы кэлбит оҕолор аҕалбыттар. Онон сибээстээн, ыарыы аттынааҕы нэһилиэктэргэ тарҕамматын туһугар үлэ барыахтаах.
Хамсык Булуҥҥа эмиэ тиийбит. Икки киһи ыалдьыбыт. Ыарыы оройуоҥҥа командировкаҕа кэлбит киһиттэн сыстыбыт. Арктика оройуоннарыгар ыарахан дьаҥ ити курдук тиийэрэ олус кутталы үөскэтэр уонна олохтоохтор долгуйалларыгар төрүөт буолар. СӨ Ил Дарханын уонна О.Балабкина аатыгар Булуҥ оройуонугар сөптөөх миэрэлэр ылыллыбаттар диэн дьон үҥсэн суруйаллар.
Суһал штаб салайааччытын солбуйааччы биирдии киһи ыалдьыбыта Мэҥэ Хаҥаласка, Нерюнгрига, Өлөөҥҥө бэлиэтэммитин эттэ.
Бүгүҥҥү брифинигэр Ольга Валерьевна ыалдьан баран үтүөрбүт өрөспүүбүлүкэ олохтоохторугар махтанна. Чуолаан, кинилэр дьоҥҥо бу ыарахан дьаҥҥа хаптарбыттарын, ыарыылара хайдах биллибитин туһунан аһаҕастык, кыбыстыбакка кэпсээбиттэрин иһин. “Бу кинилэр саҥа үөдүйбүт ыарыы туһунан аһаҕастык кэпсээбиттэрэ ханнык да брифиннээҕэр, штабтар сэрэтэр үлэлэринээҕэр быдан дьоҥҥо дьайымтыа”, — диэтэ Ольга Балабкина.
Уонна түмүккэ сайыҥҥы уоппуска кэмэ саҕаламмытынан билигин хамсык тастан кэлэр куттала баарын тоһоҕолоон бэлиэтээтэ.
Женни СТРЮКОВА.