СӨ Үүнэр көлүөнэҕэ фондата коронавируһу бохсууга хампаанньалар көрбүт үптэринэн мэдиссиинэ тэрилин, медицинскэй оҥоһуктары, эпидемияны утары эми-тому уонна көстүүмнэри атыылаһыыга, тиэрдиигэ соруктаах үлэни ыытар.
СӨ Ил Дархана Айсен Николаев ыҥырыытын ылынан, Саха сиригэр үлэлиир бөдөҥ хампаанньалар COVID-19 ыарыыны утары охсуһууга күүстэрин түмэн бэйэлэрин кылааттарын киллэрдилэр. Ол курдук, “ЯТЭК” ПАО, “Селигдар” ПАО, “Полиметалл УК”, “Тарынская золоторудная компания” АУо холбоон 72 мөлүйүөн солкуобайы уктулар. Киирбит үбүнэн Үүнэр көлүөнэ фондата былаан быһыытынан атыылаһан, туруоран биэрэр. СӨ Доруобуйа харыстабылын министиэристибэтэ биэрбит испииһэгэр ИВЛ, CLINODIGIT рентгенодиагностическай телеуправляемай, СХ50 УЗИ систиэмэтин аппарааттара, лаборатория центрифугалара, бокстар, дозатордар, о.д.а. аныгы медицинскэй прибордар киирэллэр. Итини тэҥэ былаанынан вируһу утары препараттар, эмтэр, харыстанар сириэстибэлэр, дезинфекциялыыр сириэстибэлэр уо.д.а. олоххо суолталаах медицинскэй матырыйааллары тиэрдэллэр.
“Фонда, өрөспүүбүлүкэҕэ коронавируһу утары үлэҕэ суолталаах күүһү уурар. Бу күннэргэ “Полиметалл УК” АУо 1,4 мөлүйүөн солкуобай эбии үбү ыытыаҕа. Үп Дьааҥы улууһун киин балыыһатыгар мэдиссиинэ тэрилин атыылаһарга барыаҕа. ИВЛ аппараакка туһанарга кислород концентраторын, медицинскэй пульсоксиметрдары, ыарыһахтарга монитордары, о.д.а атыылаһар былааннанар. СӨ Ил Дарханын ыҥырыытын ылыммыт тэрилтэлэргэ барыларыгар махталбытын биллэрэбит. Күүспүтүн түмтэхпитинэ эрэ эрэгийиэҥҥэ коронавирус тарҕаныытын көдьүүстээхтик бохсор кыахтаахпыт”, — диэн СӨ Үүнэр көлүөнэҕэ фондатын генеральнай дириэктэрэ Владимир Егоров бэлиэтээтэ.
СӨ Үүнэр көлүөнэҕэ фондатын пресс-сулууспата.