«До чего техника дошла!»диэн бары билэр мультипликационнай киинэбитигэр Печкин почтальон саҥа аллайбытын өйдүүр буолуохтааххыт. Билиҥҥи кэмҥэ тиэхиньикэ ордук сайдан, түөкүттэр оҕуруктаах өйдөрүнэн араас ньыманы толкуйдаан-тобулан, дьон харчытын уоралларыттан киһи бэркиһиир эрэ.
Ол курдук, Дьокуускай куорат полициятыгар федеральнай судаарыстыбаннай сулууспаҕа үлэлиир дьахтар сайабылыанньа киллэрбит. Онно быһаарбытынан, кини бу күннэргэ баан мобильнай сыһыарыытыгар киирбитэ — хамнаһа түһэр каартатыттан харчытын устубуттар. Маныаха харчы хас уһуллуутун туһунан смс-иһитиннэрии төлөпүөнүгэр кэлбэтэх.
Итини көрөөт, дьахтар счетун тута саппыт итиэннэ баантан выписка көрдөөбүт. Онно көстүбүтүнэн, кимнээх эрэ кини каартатыттан хайа эрэ кэм устатыгар кыра-кыралаан харчытын устубуттар, бары Москва куоракка регистрацияламмыттар.
Бастакы уоруу алтынньы 16 күнүгэр, онтон бүтэһик — сэтинньи 6 күнүгэр буолбут. Уопсайа 104 тыһ. солк. устубуттар.
Эмсэҕэлээччи бэйэтэ быһаарбытынан, кини баанын каартатын дааннайдарын кимиэхэ да эппэтэх, биэрбэтэх. Арай, балаҕан ыйыгар Москва куоракка сылдьан, хамнаһын каартатынан гостиницатын төлөөбүт уонна маҕаһыыннарга атыыласпыт. Сабаҕалааһын быһыытынан, чуо ити кэмҥэ баанын каартатын реквизиттэрин хайах эрэ ньыманан «сүлэн» ылбыттар быһыылаах.
Бу туһунан СӨ ИДьМ-тын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн