Бу күннэргэ өрөспүүбүлүкэ улуустарыгар РФ Төрүт Сокуонугар уларытыылары киллэриигэ куоластааһын ыытылла турар.
edersaas.ru
Кэрэхсэбиллээҕэ баар, муниципальнай тэриллиилэргэ олохтоох дьаһалталар үлэ араас көрүҥүн киллэрэн эрэллэр. Нам улууһун Хамаҕатта нэһилиэгэр сонун сүүрээн олоххо киириитин туһунан баһылык солбуйааччыта Дария Протопопова бу курдук кэпсиир:
— Нэһилиэкпитигэр 5 түөлбэ баар. Быыбар учаастактааҕы хамыыһыйатын салайааччыта Антонина Харитонова этии киллэрэн, быыбардааһыны түөлбэлэринэн тэрийэн ыытан эрэбит. Актыыбынай уопсастыбанньык кулууп дириэктэринэн үлэлиир буолан, дьону көҕүлүүр талааннаах тэрийээччи.
Таһырдьа икки балаакканы туруордубут. Кыраапыгынан балааккаларбытын түөлбэлэринэн көһөрөбүт. Бастакы күҥҥэ быыбардааһыны «Кытыл» түөлбэ саҕалаата.
Бу күн 137 киһи быыбардаата. Бүгүн «Арыы Тиит» түөлбэҕэ 96 киһи быыбардаата. Бу саамай аҕыйах киһилээх түөлбэ. Элбэх быыбардааччы — 250 киһи «Сайдам» түөлбэҕэ олорор. Онон «сайдамнар» тэрээһиннээхтик кэлэн куоластыахтара диэн эрэнэбит. Бу түөлбэҕэ икки күнү — бэс ыйын 29 уонна 30 күннэрин анаатыбыт. Бэйэлэрин түөлбэлэригэр түбэһэн быыбардаабатах дьон атын түөлбэлэргэ тиийэн, эбэтэр от ыйын 1 күнүгэр кулуупка ыытыллар түмүк быыбардааһыҥҥа кыттыахтара.
Олохтоохтор бэлиэтииллэринэн, түөлбэнэн быыбардыыр олус бэрт эбит. Сыстыганнаах дьаҥ кэмигэр дьон бэйэ-бэйэлэрин кытта алтыспат буолан, аһаҕас халлааҥҥа куоластыы кэлээччи үгүс.
Куоластааһын нэдиэлэ устата ыытыллар буолан, дьон ыксаабакка, ким хайдах сатанарынан кэлэн куоластыыр.
… Хамаҕатталар уопуттарын бу күннэргэ атын улуустар быыбардыыр учаастактара иилэ хабан ыллылар. Онон бу күннэргэ өрөспүүбүлүкэ үгүс нэһилиэктэригэр куоластааһын түөлбэлэринэн аһаҕас халлаан анныгар ыытыллыаҕа.
Елена ПОТОЦКАЯ, «Саха сирэ» хаһыат, edersaas.ru
Василий Кривошапкин хаартыскалара.