Орто Халыма улууһун Эбээх сэлиэнньэтэ улуус кииниттэн 224 килэмиэтир ыраах Абый өттүгэр сытар. Бүгүҥҥү туругунан нэһилиэккэ 377 киһи олорор. Оҕо саадыгар – 42, оскуолаҕа – 67 оҕо үөрэнэр.Уматыгы, аһы-үөлү тиэйиигэ Орто Халыма улууһугар тыҥааһыннаах балаһыанньа үөскээбитин туһунан суруйан турабыт. Бу сырыыга Эбээх сэлиэнньэтин олохтооҕо Людмила Никитинаттан сурук тутан, төлөпүөнүнэн сибээстэһэ сылдьыбыппытыгар, олохтоох хочуолунайга таас чохторо хам тоҥон, үлэһиттэр хойгуонан хайа охсон таһааралларын туһунан иһитиннэрдэ. Аны хочуолунайга тиэхиньикэлэрэ суох буолан, оскуолаттан «Беларус» тыраахтары наймылаһан, онон чохторун таһаллар.
Ыксаан отторун буранынан тиэйэн эрэллэр.
Анивера Акимова, «Саха сирэ» хаһыат, https://edersaas.ru/– Абый, Орто Халыма улуустарыгар күһүн ардахтаан, онно эбии алтынньыга уон күнү быһа инчэҕэй хаар түһэн, сүөһүбүтүн эрдэ хотоҥҥо киллэрбиппит. Аны халлааммыт тымныйан биэрбэккэ, идэһэлэнэр сүөһүлэр өргө дылы от сии турдулар. Уопсайа нэһилиэк үрдүнэн 50 ынаҕы, 149 сылгыны идэһэҕэ тутуннубут. Сайын нэһилиэк оттооһуҥҥа былаанын толорбута эрээри, хаар халыҥыттан сылгы сыһыыга кыайан аһаабакка, сэтинньиттэн аһатан, сорох ыалларга отторун саппааһа бүтэн эрэр. Тула өттүттэн кыһалҕа буолла. Улуус дьаһалтата сүөһүлээх ыалларга биирдии төбөҕө 17-лии лиитирэ бензини, сэлээркэни биэрбитэ даҕаны, улуустан кыайан кэлэ илик. Ахсынньыга “ДТ” уонна «Беларус» тыраахтардар күөлгэ муус анныгар түһэннэр, олохтоох дьаһалта тэрийбит биригээдэтэ хас да күнү быһа сылдьан, нэһиилэ хостоон аҕалбыттара, – диэн Людмила Ивановна кэпсиир.
Халлааннара хаһааҥҥытааҕар даҕаны сылаас туран уонна хаар халыҥыттан сир, күөл тоҥмокко, отторун буранынан тиэнэ олороллор эбит. Биир тонна оту тиэйэргэ ортотунан 60 лиитирэ бензини ороскуоттууллар. Бу күннэргэ кыра уйуктаах массыыналарга суол дьэ аһыллыбыт. Икки кыра массыына тиийэн кэлбит. Ол эрээри, ыарахан ыйааһыннаах тиэхиньикэ куораттан тахсан баран, төттөрү төннүбүт.
– Коммерсаннар баар буоланнар, аһынан-үөлүнэн хааччылла олоробут. Бураанынан тиэйэн аҕалаллар. Урбаанньыттарга көмө быһыытынан улуус дьаһалтата 330 лиитирэ бензини биэрбит этэ. Саҥа Дьыл бырааһынньыгар кэлбит устудьуоннар (кыыһыттан, уолуттан тутулуга суох) суукканы быһа айаннаан дьиэлэрин булбуттара. Дьокуускайга дьиэлээх учуутал кыыс бураанынан Орто Халымаҕа барбыта уонна төннөртөн аккаастаммыта. Оскуолабытыгар физика, химия, биология, английскай тыл учууталлара суох хааллыбыт. Онон оҕолорбут талбыт үөрэхтэригэр киирэр кыахтара, инники кэскиллэрэ аччаан биэрдэ, – диэн кэпсиир.
Хомойуох иһин, хоту уонна Арктика улуустара бары тутуспутунан биир кыһалҕаҕа ыктаран олороллор. Мээнэҕэ даҕаны, суол – хорук тымырбыт диэн эппэттэр. Суол-иис баар буоллаҕына, олохторо салҕанар…
“ОдьКХ» ГУП Орто Халыма улууһугар 14 хочуолунайы үлэлэтэр. Онтон биирдэстэрэ Эбээххэ баар. Киин ититэр ситимҥэ 72 чааһынай ыал уонна социальнай эбийиэктэр холбонон олороллор.
Манна эбэн эттэххэ…
Орто Халыма уонна Аллараа Халыма улуустарыгар сыарҕа үрдүттэн олоруу балаһыанньата үөскээн, «Сахаэнерго» уматыгы тиэйэр анал тиэхиньикэлээх дьону көрдүүр. Сүрүн ирдэбилэ: тиэхиньикэ уопсай ыйааһына 20 тоннаттан тахсыа суохтаах. Аҥардас, Анлрюшкино бөһүөлэгэр 590 тонна дизельнэй уматык тиэллиэхтээх. Онон, хоту уонна Арктика улуустарыгар көмөлөһөр санаалаахтар 49-35-85 төлөпүөнүнэн (факс: 21-05-86, e-mail: jdanov-in@sakhaenergo.ru) эрийэн билсиҥ.
Анивера Акимова, «Саха сирэ» хаһыат, https://edersaas.ru/