Орто Халыма улууһун I Хаҥалас нэһилиэгэр баар «Өлөөкө Күөл сылгы собуота» диэн хааһына тэрилтэтэ сылгытын Чоҥкуйа, Тоҥуулаах уонна Балаҕаннаах учаастактарынан көрөр-истэр.
edersaas.ru
Уопуттаах биригэдьиирдэр Николай Еремеев, Владимир Винокуров саталлаах тэрээһиннэринэн уонна настаабынньык бэтэрээннэр сүбэлэринэн-амаларынан, үлэ-хамнас санаа хоту салаллан иһэр.
Аныгы олоҕу кытары тэҥҥэ хаамсан, сылгылар бары чиптэннилэр, олорор дьиэлэргэ күн уотунан үлэлиир батарыайа туһаныллар. «Билайн» көмөтүнэн, сибээһи тута, үлэ-хамнас хаамыытын билсэ олороллор. Чоҥкуйа учаастагар саҥа бааза тутуллар. Былырыын манна олорор дьиэни, баанньыгы уонна харааһы туппуттар, быйыл хаһаа оҥостоллор.
– «Хаһаа» диэн элбэх сылгыны батарар анал тутууну ааттыыбыт, – диир хаһаайыстыба салайааччытын солбуйааччы Иван Винокуров. – Биһиги дойдубут, Халыма, бырдаҕынан аатырар. Бэс ыйын 20 күнүттэн саҕалаан атырдьах ыйын 10-угар диэри киһи-сүөһү тыынын хаайар, мөлтөх сүөһүнү тумнаран охторор бырдах түһэр. Онтон быыһаан, сылгылары түптэлээх хаһааҕа киллэрэн, иккилии чаас сынньатан, тыын ылларабыт. Ити курдук, сылгыларбытын төгүрүк суукка устатыгар хаста да төхтүрүйэн, хаһааҕа киллэрэн таһаарабыт.
Атырдьах ыйын ортотуттан бырдах намырыыр, дьэ итинтэн хаалбыт кылгас кэм иһигэр сылгы барахсан арыый холкутук мэччийэн, кыстыыр сыатын мунньуна охсор. Ол иһин, биир учаастакка кыһыҥҥы өттүгэр үс сылгыһыт көрүллэр буоллахпытына, сайынын икки киһи эбии ылабыт. Инньэ гынан, сайын саамай быһаарыылаах, түбүктээх кэммит.
Биир звено убаһалары кытары 250-300 сылгылаах буолар, оччо сылгыны барытын холкутук батарарга (кыараҕаска сылгы убаһаны тэпсэн кэбиһэр) 150 миэтэрэ усталаах, аҕыс миэтэрэ кэтиттээх, үрүттээх, эркиннээх уонна муосталаах хаһаа ирдэнэр.
Раиса Сибирякова, «Саха сирэ» хаһыат, edersaas.ru