Халыма өрүскэ халаан уута уустуктук ааһар чинчилээх

Бөлөххө киир:

Орто Халыма биэрэгин бөҕөргөтүүгэ өрөспүүбүлүкэ бүддьүөтүттэн 8,8 мөлүйүөн солкуобай барыаҕа. Бу туһунан Ил Дархан Айсен Николаев халаан уутуттан сэрэхтээх буолуу суһал ыстаабын мунньаҕар иһитиннэрдэ.

Санатан эттэххэ, суһал ыстаап мунньаҕар быйылгы халаан уута уустуктук ааһыан туһунан эрдэ этэн тураллар. Халыма өрүскэ быйыл эмиэ уустук дьыл буолара күүтүллэр. Ил Дархан Айсен Николаев мунньахха бэлиэтээбитинэн, быйыл Зырянка уонна Орто Халыма ууга ылларар кутталлаахтар. Онон Орто Халыманы кыйа тутуллубут даамбаны өрөмүөннүүр сорук турар. Бу сыалга өрөспүүбүлүкэ бүддьүөтүттэн 8,8 мөлүйүөн солкуобай көрүлүннэ.

Итини таһынан Ил Дархан мунньахха билиҥҥитэ халаан уута былаан быһыытынан туох да харгыһа суохтук баран иһэрин бэлиэтээтэ. Ол эрээри, кини этэринэн, даамбалары, муосталары, суоллары хонтуруоллааһын барыахтааҕын, нэһилиэнньэҕэ сэрэтэр үлэ хайаатар да оҥоһуллуохтааҕын, быстах кэмҥэ дьону олордор пууннар бэлэм буолуохтаахтарын санатан эттэ.

Улахан өрүстэри таһынан кыра өрүстэргэ, үрэхтэргэ балаһыанньа хайдаҕын болҕомто киинигэр илдьэ сылдьарга эттэ. Бу күннэргэ Таатта, Томпо, Горнай улуустарын үрэхтэригэр уустуктар үөскүү сырыттылар.

Нэһилиэнньэ олоҕор-дьаһаҕар куттал суох буолуутун хааччыйар судаарыстыбаннай кэмитиэт иһитиннэрбитинэн, билигин өрөспүүбүлүкэ үрдүнэн халаан уутун сэрэтэтиигэ барыта 112 суһал бөлөх үлэлии сылдьар.

Аграфена КУЗЬМИНА

+1
0
+1
0
+1
0
+1
0
+1
0
+1
0
+1
0