Соторутааҕыта «Халыма» федеральнай айан суолугар эмиэ алдьархайдаах быһылаан тахса сыста.
edersaas.ru
Бу тымныыга 50-ча массыына айан суолун ортотугар хаайтаран турда. Төрүөтэ — курууһу тиэммит сүүнэ улахан КамАЗ массыына халтарыйан, бырысыаба суолтан тахсан, хаарга батары түспүт.
Ыарахан таһаҕас ыйааһына баттаан, массыына төбөтүн өрө ыйаан таһаарбыт.
Дьолго диэххэ дуу, быһылаан «Хаҥалас» көмүс хостуур тэрилтэ учаастагын таһыгар буолбут. Суолга хаайтаран турар суоппардар тэрилтэ салалтатын нүөмэрин булан, көмө көрдөөн эрийбиттэр. Биллэн турар, 40-тан тахса кыраадыс тымныыга массыына өр турдаҕына, тоҥон хаалара биллэр. Саатар ол кэмҥэ дьону тиэйэн иһэр такси-иномаркалар, таһаҕас тиэйэн иһэр массыыналар хото айаннаан испиттэр.
Суоппардарга суһал көмө наадатын истээт, бастакынан Александр Карась биригээдэтэ тиийбит. «Хаҥаластар» ыарахан уйуктаах тиэхиньикэлэрин аҕалан, ыарахан таһаҕастаах массыынаны кыраан уонна бульдозер көмөтүнэн хостоон таһаарбыттар. Көмүсчүттэр салайааччыларын ыйыытынан-кэрдиитинэн түөрт чаас устата үлэлээн, суол саахалын туораппыттар. Маныаха Александр Михайлович уруккута бэйэтэ ыарахан уйуктаах массыынаҕа суоппардаабыт үөрүйэҕэ көмөлөспүтэ чахчы.
Ыраах айаҥҥа уустук климатическай усулуобуйаҕа айанныыр дьон араас түбэлтэҕэ түбэһэллэрэ үгүс. «Халыма» федеральнай трассатынан айанныыр Өймөкөөн улууһун суоппардара Александр Карась курдук бэйэ-бэйэлэригэр өрүү көмөлөһө, баалларынан-суохтарынан өйөһө сылдьар буолан, этэҥҥэ сылдьаллар.
Елена ПОТОЦКАЯ, «Саха сирэ», edersaas.ru