Элбэх оҕолоохторго анаммыт сир учаастагыттан аккаастаннахха, өрөспүүбүлүкэтээҕи Ийэ хапытаалын икки бүк улааппыт сууматын ылыахха сөп. Оттон аккаастаныы болдьоҕо бу тиийэн кэллэ – 2018 сыл ахсынньы 31 күнүгэр эрэ диэри аккаастанар быраап баар.
2018 сылга өрөспүүбүлүкэтээҕи Ийэ хапытаалын суумата 139716 солк. 68 харчыга тэҥнэһэр. Икки бүк үрдээтэҕинэ, 280 тыһ. солк. кэриҥэ сууманы ылыахха сөп. Бу ипотекаҕа бастакы усунуос быһыытынан туттуллуон сөп.
Икки бүк үрдээбит суумалаах Ийэ хапытаалын ыларга сир учаастагын ылааччылар уочараттарыттан таһаарар туһунан сайабылыанньа суруйуохха наада. Сайабылыанньаны e-yakutia.ru диэн судаарыстыбаннай, муниципальнай өҥө порталын нөҥүө эрэ биэриэххэ сөп. Атын сиргэ бэриллибэт.
Икки бүк үрдээбит суумалаах Ийэ хапытаалын ыларга усулуобуйата маннык:
-
Элбэх оҕолоохторго босхо бэриллэр учаастактан аккаастанарга 2018 сыл ахсынньы 31 күнүгэр диэри сайабылыанньа бэриллибит буолуохтаах;
-
Ийэ хапытаалын суумата туһанылла илик буоллаҕына (биирдэ бэриллэр 15 тыһ. солк. туһаныллыбыт буолуон сөп);
-
Үһүс уонна онтон кэлэр оҕо 2017 сыл ахсынньы 31 күнүгэр диэри төрөөбүт (иитэ ылыллыбыт) буолуохтаах;
-
Ийэ хапытаалын суумата олорор усулуобуйаны тупсарарга ыытыллыахтаах (өрөмүөҥҥэ ыытар көҥүллэммэт).
Бу кэнниттэн, икки бүк үрдээбит Ийэ хапытаалын сууматын туһанар туһунан сайабылыанньаны олорор сиргитинэн социальнай көмүскэл управлениетыгар биэрэҕит.
Өскөтүн, хаһан кэлэрэ-кэлбэтэ биллибэт сир учаастагыттан аккаастанар, эбэтэр бэйэҕит эрдэттэн сирдээх-уоттаах буоллаххытына, тиэтэйиҥ, бэрт аҕыйах күн хаалла. Халлаантан 140 тыһ. солк. түһэрин «хап» гыннаран ылыҥ! Билэр дьоҥҥутугар да туһалаах буолуо, биллэриҥ. Дьиэ-уот туттар, атыылаһар баҕалаах, көмүс ньээкэ уйаларын оҥостор эдэр ыалга бу көмө туһалааҕа чахчы.
Ангелина Васильева, “Саха сирэ” хаһыат, edersaas.ru