Бүлүү улууһун Халбаакы нэһилиэгин олохтоохторо өр сылларга туруорсубут биир тыын боппуруостара — иһэр уу этэ.
edersaas.ru
Нэһилиэнньэ Хаар Балаҕан диэн өрүһү кытта сибээстээх сиртэн уу баһан олорбута, саас ахсын суолу халаан уута тоҕо көтөн, элбэх ыарахаттары көрсөллөрө. Ол иһин, нэһилиэк баһылыга Алексей Васильев уонна Бүлүү улууһун баһылыга Сергей Винокуров күүскэ туруорсаннар, бу боппуруоһу ОДьКХ СУТ “Бүлүү өрүс сүнньүгэр сытар нэһилиэктэри ыраас уунан хааччыйыы” бырагырааматыгар киллэртэрэннэр, нэһилиэнньэ ыраас иһэр уунан хааччыллара ситиһилиннэ!
Онон чаас устатыгар икки кубометр ууну ыраастыыр, сууккаҕа 50 туоннаны түөрт улахан фильтр нөҥүө аһарар кыамталаах мобильнай ыстаансыйа үлэтин саҕалаата. Бу иннигэр олохтоох дьаһалта «Кэлэр кэм көлүөнэтэ» пуонда чэрчитинэн АЛРОСА үбүлээһининэн, ууну баһар «бодобуос» массыынаны ылбыта. Билигин нэһилиэнньэ ыраас ууну бытыылкаларынан ыларыгар олохтоох дьаһалта ОДьКХ СУТ улуустааҕы салаатын кытары кэпсэтэн 240 бытыылканы түҥэтиэҕэ.
Халбаакылар салалта түмсүүлээх үлэтэ кыайыылаах буоларын уу харахтарынан көрөннөр, ыраас ууну дуоһуйа иһэннэр, биир кыһалҕаттан босхолононнор үөрүүлэрэ улаатта диэн Бүлүү улууһун дьаһалтата иһитиннэрэр.
Раиса Сибирякова, «Саха сирэ» хаһыат, edersaas.ru