Маны аах Уопсастыба

Халарчаҕа сүппүт киһини көрдүүргэ  былаастан көмө көрдөһөллөр

2022 сыл ыам ыйын 31 күнүгэр Халарча туундаратыгар Аллараа Халыма улууһун  Черскэй бөһүөлэгин  олохтооҕо Валерий Егоров сүппүтэ.

edersaas.ru

Валерий кэргэнэ этэринэн, эр киһи туундараҕа сылдьар үөрүйэҕэ суох, саата, быһаҕа да суох  эбит. Кини сүтүөҕүттэн  икки нэдиэлэ ааста. Кэргэнэ  олохтоохтор бэйэлэрэ эрэ көрдүү сатыылларын, ону даҕаны сотору көрдөөһүнү тохтотуохтарын сөбүттэн долгуйар.

Сүппүт киһи  дьонуттан маннык сурук кэллэ:

«Валерий Егоров кулун тутарга “Турваургин” общинаҕа (Колымскай сэлиэнньэ)  табаһытынан аан бастаан үлэҕэ ылыллыбыта. Кини табаны  көрөр-харайар,  табаһыттыыр уонна туундараҕа сылдьар үөрүйэҕэ суох, мунар кыахтаах. Үлэҕэ киирэригэр кинини тохтообут сирдэриттэн ыраах дьуһуурустубаҕа ыыта охсуохтара суоҕа дии санаабыппыт.

Валерий Егоров ыам ыйын 15 күнүгэр Колымскай сэлиэнньэҕэ төннүөхтээх этэ. Ол гынан баран, ыам ыйын 31 күнүгэр кини дьуһуурустубаҕа барбыт уонна төннүбэтэ.

Аллараа Халыма  улууһун Халарчы нэһилиэгин баһылыга Петр Котельников иһитиннэрбитинэн, эр киһи сүппүтүн туһунан иһитиннэрии “Турваургин” баһылыга Евгений Антоевка бэс ыйын 3 күнүгэр киирбит. Кини нэһилиэк баһылыгар тириэрдибит.

Сүппүт эр киһини  аан бастаан 4 киһи – община чилиэннэрэ көрдөөбүттэр.

Халарча нэһилиэгин баһылыга Петр Котельников улуус баһылыгын аатыгар сайаапка суруйбут. Бу сайаапканан бэс ыйын 7 күнүгэр Саха сирин Быыһыыр сулууспатын Халыма көрдүүр-быыһыыр этэрээтин бөртөлүөтүн ыҥырбыттар. Бөртөлүөт табаһыттар тохтообут сирдэригэр оттугу, бородууктаны аҕалбыт уонна чугастааҕы сирдэринэн көтөн көрдөөбүт да, көдьүүһэ суох буолбут.

Бэҕэһээ, бэс ыйын 14 күнүгэр, эр киһи сүппүт сиригэр олохтоохтортон уонна община үлэһиттэриттэн турар иккис көрдүүр биригээдэ барда. Кинилэр тиэхиньикэ илтилэр, ону сэргэ община дрон биэрдэ.

Билигин 10 киһи уонна 4 тиэхиньикэ (2 буран уонна 2 вездеход) көрдүүллэр.

Петр Котельников быыһааччылар  дьайыыларын сүрүннүүр туһугар көрдүүр-быыһыыр этэрээт наадатын туһунан этэрэ оруннаах.

2-3 киһилээх анал көрдүүр бөлөҕү ыыталларыгар  өрөспүүбүлүкэбит былааһыттан көрдөһүөхпүтүн баҕарабыт. Тоҕо диэтэххэ,  сүрүннээн олохтоох дьон эрэ көрдүүр. Дьиҥэр, табаһыттар сири-уоту үчүгэйдик билэллэр да, дьон син биир аҕыйах. Хас да күн көрдүүр курдук эбии бөлөҕү ыытыахха наада.  Бастаан табаһыттар тохтообут сирдэриттэн  10 килэмиэтир радиустаах сиргэ көрдөөбүттэрэ. Билигин 20-25 килэмиэтиргэ диэри кэҥэттилэр. Көрдөөһүн барыта сиринэн ыытыллар. Колымскай сэлиэнньэттэн тохтообут сирдэригэр  диэри 120 килэмиэтир, киһи кыайан сылдыбат, өрүстээх уонна бадарааннаах дойду.

РФ Ыксаллаах  быһыы-майгы министиэристибэтин Саха сиринээҕи салаатыгар ыыппыппыт. Биһиэхэ эбии дьон, ыттаах быыһааччылар наадалар.  Халарча туундарата киэҥэ  бэрт, онон олохтоохтор эрэ күүстэринэн кыайар кыахпыт суох.

“Эрэлбитин сүтэрбэппит. Үс сыллааҕыта биир киһи сүппүтүн  45 күнүнэн булбуттара. Онон, сиринэн үлэлиир бөлөҕү элбэтэр буоллар, туһалаах буолуо этэ”, — диир Халарча нэһилиэгин баһылыга”.

Надежда ЕГОРОВА, «Саха сирэ», edersaas.ru

0
0
Telegram Whatsapp