Маны аах Уопсастыба

Николай Павлов-Халан: «Сахалар, хаһыаты сурутуҥ!»



Сахалар бассаапка убанныбыт. Ол төһө да сонньуйбуппут, бириэмэни сиир диэн киҥир-хаҥыр саҥарбыппыт үрдүнэн, эргиччи үчүгэй. Үлүннэрдэххэ, күммүт-ыйбыт бассааптан тахсар буолла. Уонна оттон хайдах киэҥ нэлэмэн Сахабыт сиригэр, суол-иис мөлтөҕөр, саатар бу хамсык дьону хайыппыт кэмигэр таһаарыылаахтык үлэлиэ, үөрэниэ, дьоммутун кытта билсэ олоруо этибитий?

Ол эрээри, бассаап күннээх эрэ. Бүгүн кэпсэттибит, санаа атастастыбыт — сарсын онтубут сүтэр, сороҕор урут суруйбуккун көрдүү да сатаатаххына булан ылбаккын… Сатаатар төһө эрэ буолан баран сүтэн-симэлийэн хаалар эрэсиим үөдүйэн эрэр. Ханнык эрэ бөлөххө кэпсэппитиҥ хас эрэ хонон баран сотуллан хаалыан сөп. Оннугу бөлөх дьаһабыла холбоотоҕуна.

Онон бассаап саха саҥата интэриниэт киэлитигэр элбииригэр бэйэтин кылаатын быһаччы киллэрбэтин кэриэтэ. Бу көннөрү киһиэхэ улахан суолтата суох курдук. Ол эрээри, саха аҕыйах, сахалыы саҥарар саха онтон аҕыйах. Онон, баҕар, биир эмит киһини эбии угуйаарабын диэн суруйабын. Төһөнөн элбэхтик төлөпүөн, көмпүүтэр нөҥүө суруйсабыт, ону маны сахалыыны угабыт, ырытыһабыт да, оччонон саха тылын туруга күүһүрэр, чиҥиир, тылбыт кэскиллээх буолар.

Онон бассаап хоруппут хонуутугар туһалаах туораахтары ыһарбыт буоллар, ол аата суруйа үөрэммиппитин туһанан араас эгэлгэ саайтарга киирэн, онно ырытыы таһаарар үөрүйэҕи олохтуурбут буоллар тылбыт чэлгийэ сайдыа этэ!

Холобур, СИА сахалыы таһаарыыларын билигин ааҕар саха быстар аҕыйах. “Саха сирэ” хаһыат edersaas.ru диэн ситим-сирин ааҕар киһи арыый да элбэх, ол эрээри, син биир мөлүйүөн аҥаара ахсааннаах омуктан биир бырыһыана да киирэн аахпат. “Кыым”, “Киин куорат” курдук хаһыаттар эмиэ биир оннук турукка олороллор.

Аны биири бэлиэтии көрөбүн. Урут кырдьаҕас суруналыыстар ахтыыларыттан эҥин көрдөххө, дьон көннөрү кумааҕы суругу суруйа үөрүйэх этэ, хаһыакка сурук бөҕөтө көтөх муҥунан киирэрэ, эрэдээксийэлэргэ анал сурук отделлара, сыһыарыллыбыт дьон баар буолаллара. Ол билигин суох. Тоҕо? Аныгы киһи кумааҕы суругу суруйбат буоллаҕа диэххит. Сөп, кырдьык, оннук. Ол эрээри электроннай сурук даҕаны киирбэт дииллэр эбээт. Бассаабынан да тахсан, хаһыакка тахсыбыт ыстатыйаны ырытар киһи суох быһыылаах.

Ол аата тугуй? Ол аата ааҕааччы хаһыаттан тэйдэ. Оттон хаһыат үлэһитэ ааҕааччы туох санаалаах олорорун билбэт буолла.

Бу биллэн турар сурутууу, тираж аҕыйыырыгар тиэрдэр. Оттон сурутуу аҕыйаатаҕына эрэкилээмэ сакаастыыр дьон эмиэ аҕыйыыр. Оччоҕо хаһыат биир сүрүн атаҕа быстар — үп киллэрбэт буоллаҕына, үбү сайдыыга ыытара эрэ буолбакка (холобур, өҥнөөх, дьэрэкээн үчүгэй кумааҕыга тахсыы, командировкалар иҥин), хамнас да төлүүр кыаҕа кыччыыр, очччоҕо тыыппалаах, кэскиллээх үлэһит ол хаһыаттан барар…

Сахалыы хаһыаттарга, дьиҥэр, уникальнай дьон үлэлиир. Аан дойдуга идэтийбит сахалыы суруйар суруналыыс суох ээ! Биһиэхэ эрэ баар! Бу биһиги сахалар киһи аймахха бэлэхпит, бүттүүн аан дойду дьонугар кэһиибит. Баҕар сонньуйуоххут, ол сахалыы суруйбуттарыттан миллиардынан ахсааннаах киһи-аймах тоҕо үүнэн-чэчирээн тахсыай диэн. Биһиги сахалар курдук сүөһүнү бачча хоту тыйыс айылҕаҕа ииппит омук суох ээ. Ити эмиэ киһи-аймах бүттүүнүн кыаҕын көрдөрөр, холобур буолар. Эмиэ оннук биһиги тылбыт-өспүт бэйэтигэр туспа куоду илдьэ сылдьар. Ол куод атын дьонтон ураты буоларбытын кэрэһилиир.

Атын аҕыйах ахсааннаах омуктары көрдөххө, бэйэлэрин омугунан суруналыыстыкалара суруйартан саҥарарга көстө. Ол аата хаһыаттара-сурунааллара сабыллан, бары араадьыйаҕа уонна тэлэбиидэнньэҕэ көстүлэр. Тоҕо диэтэххэ, ааҕар киһилэрэ аҕыйаан, билигин истэр дьоҥҥо эрэ эрэнэллэр. Хапхаас омуктара, холобур, бэйэлэрин тылларынан саҥараллар, тоҕо диэтэххэ төрөппүттэрэ дьиэлэригэр хайаан да үөрэтэллэр. Ол эрээри, оскуола аанньа үөрэппэт буолан, суруйарга уонна уһун тиэкиһи ааҕарга, өйдүүргэ үөрэммит киһилэрэ аҕыйаан иһэр.

Маннык турук туохха тиэрдэрэ биллэр, хаһыаты аахпат киһи ама, арамааны ааҕыа дуо? Ол аата суруйааччыларын ааҕар дьоно эмиэ аҕыйыыр. Уус-уран литэрэтиирэлэрэ буомурбутунан киирэн бардаҕа ол дии. Саҥа айымньы суруллубат, суруйааччы ааҕааччытын булаары атын тылга көһөр…

Онон, доҕоттоор, хаһыатта дэлби сурутуҥ, кыаммат дьоҥҥо бэлэх сурутуута оҥоруҥ уонна хаһыаты ааҕа-ааҕа онно тахсыбыт матырыйааллары дэлби ырытыҥ! Кириитикэлээҥ, хайҕааҥ, суруналыыстары болҕомтоҕутунан өйөөҥ! СИА-ны, Улус-медианы күн аайы киирэн көрөр буолуҥ, онно аллараа өттүгэр ырытыы баар буолар, онно суруйуҥ, кэпсэтиитэ тааһаарыҥ!

Николай Павлов-Халан.

27
1

Николай Павлов-Халан: «Сахалар, хаһыаты сурутуҥ!»

  1. Дьэ, атаһым Дьөгүөр ситэ суруйа илик ыстатыйабын ылла да таһааран кэбиспит 😉 . Бу хомуруйаары буолбатах, төттөрүтүн хайҕаан суруйабын. Суруналыыс диэн маннык буолуохтааҕа буолуо — түргэн-тарҕан туттуулаах!
    Оттон ыстатыйа тыла-өһө, аргуменнара чочуллубатаҕа бэйэм буруйум буоллаҕа.
    Ол оннугар санааларым дьоҥҥо көһүннүлэр диэн үөрэбин эрэ.

    Полемическай хабааннаах ыстатыйаны чочуйа сатыы олорор да, аныгы үйэҕэ туох да туһата суох.
    бу манна этиллибит санааларбын толкуйдаан көрүҥ, сөп дуу, суох дуу, сороҕо син сөп диэтэххитинэ дьоҥҥо тарҕатыҥ, мөккүстүннэр, утардыннар, биитэр өйөөтүннэр.

    Бу барыта саха тылын кэскилигэр туһалыа. Байҕалга баҕа да силэ эмтээх дииллэр 😉

    1. Сахалыы сурук,сахалыы саҥа тыын кыһалҕата сөпкө этиллибит.Дьон тоҕо Бассаабы талла?Суруйарга,ааҕарга судургу,сууххай.Ол иһин.СИА ны ааҕарга көмпүүтэр «тордуоҕун-сүргүөҕүн» ааһыахха наада.Арай,сигэтин Бассаапка таһаардахтарына ону баттаан киирэн көрөбүт,сааһырбыт дьон.Бу сааһырбыт дьон диэн,дьэ, кумааҕынан кинигэни аахпыт ,ааҕар үөлээн(көлүөнэ) дьоно.Биһиги бүттэхпитинэ «кумааҕы ааҕааччы» да бүтэрэ буолуо.Хаһыаты дьиэҕэ олорон сурутуу сигэлэрин бассаабынан тарҕаттахха сурутааччы ахсаана элбиэ этэ.Эдэр дьон көмпүүтэртэн сүрүн солуну-нуомаһы ыла,туһана олорор буолан сурутан ылан ааҕыыны баардылаабат.Тэлэбиисэр үөдүйэрин саҕана тыйаатырдар,киинэ сааллара сүтүөхтэрэ диэбиттэр үһү.Ол да буоллар бааллар дии,саҥа да аһыллаллар,холобур,Олоҥхо тыйаатыра.Судаарыстыба өйүөн эрэ кэрэх.

      1. Махтал, Архаадьый! «Кумааҕы ааҕҕааччы» аан дойдуга ахсаана түһэ сылдьан баран төттөрү үрдээн бигэ туруктанна диэччилэр. Идэтийбит суруналыыстар матырыйаалларын ааҕар оттомноох дьон хаһан да баар буолуохтара.

  2. эрэдээксийэлэр киирбит суругу туппуттарын-туппатахтарын, таһааралларын-таһаарбаттарын туһунан хардаран суруйбаттар, ол иһин. үчүгэй ааптардары, суруйуон сөптөөх, араас кыһалҕаны көтөҕөр идэлээх дьону кытта ситими олохтуур салгымтыалаах, хара үлэни ким да сүгэн толоруон баҕарбат. барыта сүүрэн иһэн, атара сэлиинэн ))

  3. Дьон үксэ наадыйбат хаһыаттарга билигин — барыта смартфоҥҥа баар буор-босхо. Куруутун этэрим курдук — бу сыыйа-баайа бара турар процесс: саҥа айар дьон үөскээбэт, дьиҥ сэргэх айымньы аҕыйах тахсар, популярнай контент кырыымчык, дьон тылын умнан иһэр. Тылынан туһанар диэн эмиэ киһи биир кэмэлдьитэ, ол туохха эрэ тириэрдэр, тугу эрэ биэрэр, өйү-иэйиини үөрдэр-кэрэхсиир буолуохтаах. Итини барытын айар дьон бэйэлэрин дьоҕурдарынан туһанан айаллар, инник дьон үгүс буоллахтарына барыта этэҥҥэ. Айар дьон ахсаана быһаарар — манна из количества в качество принцип чахчы оруннаах. Аҕыйаатылар да качество мөлтүүр. Сонно дьэ конкурент атын тыл киирэн иһэр, элбэҕи кэпсиир-көрдөрөр, ону-маны дьиктини, көр-нар кэпсээни, эгэй эгэлгэни. Онтон кэннэки ол-бу симптом көстөр — холобура, сахалыы тираж аччыыр. Ыарыы силиһин көрөн билиэхтээхпит, содулун эрэ буолбатах.

    Рынок хамсаныыта харан турар. Сахалыы айымньыга, быһатын көрдөххө, спрос диьҥэр баар (сахалыы киинэ ону көрдөрөн турар), киинэттэн атын эйгэҕэ «предложение» аҕыйах эбэтэр качество сөп түбэспэт. Ол иһин, саҥа автордары элбэтиэххэ наада конкурстарынан уонна эҥин саҥа проектарынан, спровоцировать перерождение заново рынка, чтобы появился новый свежий продукт, новое предложение, которое потом еще подстегнет спрос.

    1. Оннук, бэйэтин бэйэтэ күүскэ көҕүлүүр турукка киириэхтээх, сахалыы айар-суруйар дьон-сэргэ, ол иһигэр суруналыыстыка эмиэ.
      Утуйан олорбокко. Саҥа үйэҕэ саҥалыы киэбинэн.

Добавить комментарий