Халабырдьыты туппут Филипп Кириллиҥҥэ Ис дьыала министиэристибэтэ «Махтал» уонна чаһы туттарда
Сайтпытыгар бу дьыл 5 күнүгэр «Дьокуускайга 11-с кылаас үөрэнээччитэ Филипп Кириллин халабырдьыты тутта (ВИДЕО)» диэн иһитиннэриибит бэчээттэммитэ. Бүгүн Ис дьыала министиэристибэтигэр үөрүүлээх быһыыга-майгыга хорсун уолга наҕараада туттардылар.
СӨ ИДьМ-тын пресс-сулууспата иһитиннэрбитинэн, министиэристибэ коллегиятын саалатыгар Дьокуускай куорат 31 №-дээх орто оскуолатын 11 «б» кылааһын үөрэнээччитэ Филипп Кириллиҥҥэ ис дьыала миниистирэ, полиция генерал-майора Владимир Прокопенко «Махталы» уонна наградной хары чаһытын туттарбыт. Кини хорсун быһыытын уонна буруйу «сылааһына» арыйыыга көмөтүн иһин.
Санатар буоллахха, ыам ыйын 4 күнүгэр, сарсыарда 09.30 мүн. саҕана, киин куорат 31 №-дээх оскуолатын таһыгар 1990 сыллаах төрүөх, урут хаста да сууттана сылдьыбыт киһи 10-с кылаас үөрэнээччитигэр саба түһэн, кыыһы 11-тэн итэҕэһэ суохтук төбөҕө охсон баран, суумкатын былдьаабыта.
Ити кэмҥэ оскуолатын олбуоругар киирэн испит 11-с кылаас үөрэнээччитэ Филипп Кириллин илиитигэр дьахтар суумкатын туппут, тиэтэллээхтик хааман иһэр, кыратык доҕолоҥнуур киһини өйдөөн көрөн, туох буолбутун тута таайан, кэнниттэн эккирэтэн, гараастар аттыларыгар ситэ баттаан ылбыта.
Уол бөрөстүүпүнньүгү биирдэ кэтэххэ охсон охторон, суумканы былдьаан ылан, кыыска биэрэн, «суһал көмөнү» уонна полицияны ыҥыран баран, уорбаланааччыны полиция кэлиэр диэри тутан турбута.
Бу чахчынан силиэстийэ уорганнара «халааһын» ыстатыйанан холуобунай дьыала тэрийэн силиэстийэлииллэр.
Биһиги корр., «Саха сирэ» хаһыат, edersaas.ru
Хаартыскалар: СӨ ИДьМ-тын пресс-сулууспата.