Дьокуускай пааркатыгар тииҥнэр олохсуйбуттара уонча сыл буолла. Айылҕа маанылаах оҕолоро киһиттэн куттамматтар, илииттэн кэлэн аһыы үөрэммиттэрэ ыраатта. Ону тэҥэ куорат кытыытыгар, ойуур аттыгар турар даачаларга тииҥнэр эмиэ бааллар.
Ол да буоллар, куорат килбэйэр киинигэр, Орджоникидзе болуоссатын таһыгар биир тииҥ кэлэн аһыыр идэлэммитэ дьикти. Тииҥ ыттартан, массыыналартан куттаммакка, уулуссалары туораан кэлэр эбит. Ол иһигэр, массыына сырыыта түүн да тохтообот Лермонтов уулуссатын эмиэ. Баҕар, дьиэлэр үрдүлэринэн, уот боруобаттарынан “айаннаан” кэлэрэ буолаарай?
Тииҥи Орджоникидзе уулуссатыгар баар “7/1” парикмахерскай үлэһиттэрэ көрөн хаартыскаҕа түһэрбиттэр. Түүтэ-өҥө тупсан, көрөн-истэн чэрэҥэлээн, кэлэн-баран сырбалдьыйан, барахсан, айылҕа дьиҥнээх мааны оҕото!
Екатерина Иванова, парикмахер:
—Бу сэтинньи ыйтан ыла түннүкпүтүгэр кэлэн олорор, омурдугар толору симтибит эриэхэтин сиир буолбута. Арааһа, үөһээ этээстэртэн ханнык эрэ болкуонтан кедр эриэхэтин уоран сиир. Күнү быһа таһар да таһар, ханна эрэ кистиир быһыылаах. Ыйы быһа таста. Үлэһитэ диэн сүрдээх. Дьонтон олох куттаммат, түннүгү астахха, дьиэҕэ да киириэх курдук.
Дьэ, тииҥ астаах сири билэн буулаатаҕа. Иҥэмтиэлээх, сыалаах эриэхэни булан, абыраннаҕа. Арай, хаһаайыттара бу айылаах “халааһыны” хайаан билбэт, кыһаммат эбиттэрэй?
Ангелина ВАСИЛЬЕВА.