Ааспыт нэдиэлэҕэ социальнай ситимнэринэн биир маҕаһыын кэтээн көрөр видеокамератыгар уһуллубут түбэлтэ тарҕаммыта. Онно хаки өҥнөөх анал таҥастаах икки киһи маҕаһыыны халыыллара көстөр.
Дьокуускай куорат полициятын пресс-сулууспата иһитиннэрбитинэн, бородуукта атыылыыр маҕаһыынтан халабырдьыттар 5000 солк. уорбуттар. Оттон компьютернай кулууптан каасса аппараатын кыбынан тахсыбыттар.
ИДьМ Холуобунай ирдэбилгэ управлениетын уонна киин куорат полициятын талааһыннары арыйар отделениетын оперативниктара күнүстэри-түүннэри үлэлээн, бу «серийнэй» халааһыннарга уорбаланааччылары туттулар. Биирин — олорор дьиэтиттэн, Росгвардия управлениетын байыастарын көмөтүнэн, иккиһин — куотан истэҕинэ.
Уорбаланааччылар иккиэн 24 саастаахтар — биирэ урут талааһыҥҥа түбэһэн сууттана сылдьыбыт, ханна да үлэлээбэт киин куорат олохтооҕо.
Иккиһэ — Мирнэйтэн төрүттээх, үрдүк үөрэх кыһатын бэһис кууруһун устудьуона.
Доппуруос кэмигэр уорбаланааччылар буруйдарын билиммиттэр, дьэҥдьиир кэмигэр хаки өнөөх анал таҥастарын булбуттар.
Талабырдьыттар өссө 6 атыы-эргиэн дьиэлэрин халаабыттара биллибит.
«Талааһын» ыстатыйанан холуобунай дьыала тэриллибит.
Биһиги корр., «Саха сирэ» хаһыат, edersaas.ru
Хаартыска уонна видео: Дьокуускай куорат полициятын пресс-сулууспата.